Segun cifranan publica pa Banco Interamericano di Desaroyo (Interamerican Development Bank; IDB), exportacion di e region a cay cu 1,6 porciento, compara cu e mesun periodo di 2018. E reduccion ta causa pa menos exportacion den volumen y prijs di materia prima cu a cay.
E tendencia negativo aki ta significa un fin di 27 luna di crecemento continuo. Exportacion a cay den tur subregion, pero e caida tabata particularmente fuerte na Suramerica, di acuerdo cu e ultimo ‘update’ di Trade Trend Estimates: Latin America and the Caribbean, publica recientemente. IDB ta emiti e reporte aki cada seis luna.
Exportacion a crece sin embargo den diferente di e 26 paisnan discuti den e informe, aunke Barbados, Haiti, y Surinam tabata e unico nan cu a surpasa nan prestacion di e aña anterior.
“Un combinacion di factor di riesgo ta afectando e panorama pa comercio regional,” Paolo Giordano ta bisa, e economistanan Seccion di Comercio y Integracion di IDB cu a coordina e informe. “Loke ta sucede proximamente ta depende grandemente di e resultado di tensionnan global actual, si America Latino y Caribe ta keda riba un ruta di crecemento.”
E cifranan di prome kwartaal di 2019 ta contrasta cu e datonan revisa di 2018, cu a mustra un crecemento di 8,9%, aunke esaki a disminui durante aña, segun cu conflictonan comercial a escala.
Balor di importacion na America Latino y Caribe a crece cu 10,8% na 2018 prome cu esaki a stagna den prome trimester di 2019. China tabata e destino mas dinamico pa exportacion di e region na 2019. Demanda for di Merca y Europa pa producto di region a baha considerablemente.
