Dia 13 di october lo tuma luga na Renaissance Convention Center Expo “Promove salud y bienestar 2024” e cual ta organisa pa Departamento di Salud Publico (DVG) hunto cu Plataforma di Promocion di Salud y Ministerio di Salud Publico.

Pa di tres aña consecutivo esaki ta bay tuma luga unda cu cada biaha ta birando mas grandi segun vocero di Departamento di Salud Publico, Jurette Croes a bisa, indicando cu ta un evento gratis cu lo cuminsa for di 10or di mainta te cu 4or di atardi.

Ta bay tin hopi actividad di diferente instancia cu lo bin hunto e dia aki manera Dahariana Everts di departamento di Health Promotion a bisa, cu tur aña hunto cu DVG y Ministerio di Salud ta haci un expo di salud dedica na diferente tema unda e aña aki nan tema ta “Ban papia di obesidad” en conexion cu e resultadonan di STEPS 2023 den e parti di nutricion y obesidad di e personanan.

Teniendo na cuenta esaki, nan ta bay tin no solamente den expo aki sino tambe nan ta bay zorg pa dedica e fin di siman ey na salud, diferente organisacion ta bay haci testnan gratis loke ta nifica cu comunidad lo por topa cu algun miembronan di DVG na supermercadonan pa promove salud y diadomingo lo haci un extra chekeo den e expo.

Como parti di e actividadnan pa dia 13 di october, den esaki tambe lo tin un caminata di Stichting BOB cu awor ta yama Fundacion ABO cu ta cuminsa 6or di mainta, “nos tin mas di 25 organisacion y algun di nan ta bay ofrece chekeo di bista, sanger y pecho completamente gratis,” el a bisa.

Pa loke ta trata obesidad, nan ta bay tin diferente charla cuminsando for di 11or di mainta cu ta bay dedica riba e resultado di STEPS riba obesidad, e siguiente ta bay ta den man di dokternan specialista di Hospital Dr. Horacio oduber cu lo papia dia di casonan di diabetes y prevencion, proceso di cirugia ora un hende ta obeso y kico e metodo ey ta nifica, e cambio di bida cu e persona mester tin y di ultimo un charla di Dr. Franca e cual ta un specialista cu lo papia di prevencion di cancer di colon.

Di su parti, Rudymar Geerman ken ta fungi como hefe di departamento di Desaroyo di Deporte na IBiSA a bisa cu manera ta conoci, IBiSA semper ta presente den eventonan cu ta promove salud y movecion.

Nan ta bay ta presente cu informacion di nan actividadnan fisico, con un persona por mantene su mes cu un peso saludabel, igualmente e publico assistent lo por controla su peso unda na final e persona lo haya un conseho si ta obeso of no y kico ta e pasonan cu lo por tuma pa ta mas saludabel.

Nan ta bay tin nan parti di movecion cu un full un area dedica na esey “esey ta un manera di stimula bo pa keda den mas movecion posibel y contribuyendo na bo salud,” Geerman a sigura.

Marleen Bakker di departamento di Comunicacion di Hospital Dr. Horacio Oduber a bisa cu “Hospital semper a kere den expo salud y pa di tres aña nos ta forma parti di dje caba, e biaha aki nos a bin cu cinco stacion team di rehabilitacion lo t’ey y ta bay haci un diferente test, por ehemplo pa midi e vet den e curpa y e test di forsa.”

Nan dietista tambe ta bay ta presente pa papia tocante e uso di salo den alimentacion e cual pa hopi biaha ta relaciona cu presion di sanger halto y esey tambe por yega na casonan di obesidad.

LABHOH tambe ta bay ta den expo aki cu lo pone un muestra di un pida di vet pa publico lo wak den un microscop y ademas Bloedbank cu lo duna informacion tocante con por bira un donante di sanger.

Mary Ann Kock ken ta traha pa jeugdgezondezorg na DVG a bisa cu nan ta bay ta den expo cu un luga full dedica na mucha y nan a scoge e tema di e movie “Inside Out” e cual ta relaciona cu mucha, “pa mayornan y muchanan sa y conoce kico ta nos trabou como enfermeronan di scol,” el a bisa.

Tambe lo tin informacion di Scol Saludabel unda nan lo pisa y midi e muchanan, pa registra nan y lo haya un papel pa bay cune cas y nan por follow up esaki, na final di esaki lo duna premionan na e muchanan.

Pa finalisa, DVG ta invita comunidad pa yega na Renaissance Convention Center for di 10or di mainta te cu 4or di atardi pa presencia e charlanan informativo di profesionalnan y dokternan. Nan a señala cu comunidad mester keda pendiente di nan rednan social pa haya sa mas tocante e oranan di cada actividad cu ta dirigi pa hendenan di tur edad.