Ainda e cifra di desempleo despues di e delaster encuesta laboral ta alrededor di 7,7% . Asina e mandatario encarga cu e ministerio di Labor, Angel Bermudez ta declara ayera den cuadro di e di dos Expo Labor cu lo tuma luga otro siman.

E evento aki lo pone enfasis riba e hobennan den nos comunidad cu mester di trabou. Un grupo di 4 mil persona no tin trabou, y mas o menos 20% di nan ta hoben. Segun gobierno ta calcula un alrededor di 900 persona cu ta den edad di 15 pa 24 aña.

Minister Bermudez ta laga sa cu nos mercado laboral ta produci 56 mil cupo di trabou.  El a indica cu compara cu aña anterior nan a registra un progreso den e cuponan di trabou disponibel. Pero di otro banda e cantidad di hende cu ta buscando un trabou tambe a aumenta.

Pero relativamente compara cu aña 2015 e tasa di desempleo a baha na 2016 segun e mandatario. Esaki ta conta principalmente pa e grupo di hobennan cu ta den edad di productividad laboral. Sinembargo e ta haya cu e cifra mester baha mas pa e poblacion aki.

Nan kier promove cu e grupo di desempleado aki por participa den e proceso laboral di nos pais. Considerando cu tin ainda hopi peticion pa permiso pa stranheronan bin traha akinan. “Nos ta kere cu prome cu nos ta otorga eseynan den todo caso nos propio hendenan mester haya oportunidad di un posicion prome”, e mandatario ta bisa.

Expo Labor

Expo Labor lo tuma luga otro siman diasabra 19 di augustus na Renaissance Convention Center for di 9’or di mainta te cu 7’or anochi. E ta un plataforma pa trahadonan y desempleadonan; pero tambe pa doño di trabou por promove y delibera cu otro riba oferta di trabou cu nan tin pa esun cu ta buscando un trabou. Pero tambe pa esun cu lo desea un cambio di trabou of di nan funcion.

Den cuadro di e Expo Labor lo presenta algun charla unda oradornan invita lo trata diferente topico di interes. Entre otro lo tin un tayer riba revision di curriculum (CV), unda tur hende interesa lo ricibi asistencia den esaki.

Sinembargo nan kier yega cu e Expo Labor aki na 4 mil hende cu lo desea di traha of cambia di trabou pa asina aplica pe. Esaki no ta inclui esunnan cu actualmente ta hayando ayudo social; ya sea onderstand of bijstand. Pero e grupo aki tambe cierto momento ta wordo pidi pa nan acudi na e Job Center pa asina wak si nan por traha. Sinembargo tin un grupito di nan cu pa un of otro motibo sea capacidad limita  no por participa den nos mercado laboral, segun e minister.

Trahado di afo

Ora cu e ta wak e cantidad di peticion pa permiso y esunnan cu ta registra pa un empleo, tin un diferencia entre e competencia cu e desempleado tin; y e condicionnan exigi pa e vacatura di e dunadonan di trabou. Sr. Bermudez ta bisa cu actualmente ta exigi un necesidad laboral pa coki, panadero, metsla y otro ofishi nan cu no tin bastante hende den mercado pa asumi e oferta di trabou aki. E ta haya cu aki nan gobierno tin trabou pa haci pa asina fortifica e habilidad di trahado pa  medio di cursonan pa atende cu e vacaturanan aki.  

Website di trabou nobo

E minister tambe a introduci ayera oficialmente e website nobo di Departamento di Progreso Laboral (DPL). E ta duna informacion riba Job Center y henter e procedura cu tin pa permiso di trabou.  E link di e website aki ta www.dpl.aw E mandatario ta spera cu haciendo uzo di e medio aki lo contribui pa crea mas conscientisacion y mas informacion pa nos poblacion laboral.