Expo Health & Wellness gratis diadomingo awor pa comunidad di Aruba

Diadomingo 29 di september na Hyatt Place Airport lo tuma luga e Expo Health & Wellness Aruba unda organisadonan ta bay enfatisa riba e importancia di salud y bienestar pa e comunidad, cu un enfoke special riba prevencion y tratamento innovador.

Pa esaki, Jenny Montiel ken ta presidente y fundado di Expo Health & Wellness Aruba a seña cu ta bay ta un evento importante pa e comunidad Arubiano mirando cu ta enfoca riba e salud preventivo cu e presentacion stakeholder di diferente area manera, comercial, fundacionnan, dokternan specialista den wowo y dentista cu ademas ta bay duna charlanan educativo.

Montiel a sigura cu esaki ta un evento gratis unda comunidad ta bonbini pa asina por haci diferente test. Aruba ta conoci pa ta un pais cu tin estadisticanan halto di sobrepeso, e causante di diferente malesanan cronico manera hipertension.

“Despues cu e malesanan aki ta drenta na nos curpa, e complicacionnan di salud ta bin cu por tabata reversibel si nos ta cuminsa ataca nan na tempo, pero tambe si nos no ta cuida nos curpa,” el a bisa.

Den su opinion, Montiel ta considera cu hende grandi tin mas riesgo debi cu nan tin un sistema inmunologico debil, su emocionnan no ta ekilibra, un PH desbalansa, no ta bebe awa, ta bebe diferente remedi, e ora ey nan ta sufri complicacionnan cu pa hopi biaha ta ireversibel.

Den esaki, Montiel tambe a señala cu e poblacion hoben tambe ta sufriendo unda cada dia mas tin mas caso di hende cu depresion y ansiedad, “no tin e cultura cu nos tin cu cuida nos curpa pa por ta un adulto saludabel.”

Fabiola Zambrano ken ta forma parti di e organisacion di e evento aki a sigura cu esaki ta un proyecto cu nan a trece dilanti mirando cu nan ta personanan cu ta traha den area di salud y nan a uni pa comunidad di Aruba pone mas atencion riba su salud y bienestar.

E expo aki ta bay presenta charlanan educativo cu personanan specialisa, tambe lo tin un area di movecion cu training di diferente gym y lo cuminsa for di 10or di mainta te cu 5or di atardi na Hyatt Place Airport.

“Nos ta motiva hendenan pa ta mas activo y mas saludabel, despues di Covid Aruba ta mas consciente y nos lo sigui haci e tipo di actividadnan aki,” Zambrano a bisa.

Pa finalisa, nan ta spera cu comunidad di Aruba por asisti diadomingo awor pa asina haya mas informacion tanto di personanan specialisa den area di salud y di diferente otro stakeholders enfoca riba e area aki.