Pueblo di Aruba ta cordialmente invita pa bin presencia un exhibicion di arte ‘Savoury Memoir In Colored Spices’ tumando lugar Diahuebs 29 di September, di 7pm pa 10pm. Esaki ta un Expo cu entrada totalmente gratis na unda lo por mira e variedad di trabaonan realisa pa participantenan di un tayer cu a wordo duna titula ‘Unexpected Memories Through Smells’ pa artista visual Razia Barsatie.

Chrislene Arends, PR Manager na Ateliers’89, ta splica reportero di Bon Dia Aruba cu Atelier’89 ta organisa tayernan tur luna. Cada aña nan tin un programa cu ta cubri full e aña, e tayer recien aki pues tabata parti di e programa. Ateliers ta haci un tipo di seleccion halto unda ta selecta docentenan gradua, cual ta wordo haci entre miembronan di e board na Hulanda y na Aruba pa loke ta e docentenan cu ta bini Aruba pa duna les pa e aña cu ta bini.

Mondriaan Fonds ta e sponsor di mas grandi cual awor a caba di patrocina Ateliers cu dos aña unda por funciona, yudando cu pago di e docente y transportacion pa bin Aruba, y cualkier otro costo di materialnan. E artistanan ta wordo selecta den varios ramo pa cubri tayernan pa henter e aña manera disciplina di fotografia, video editing, trahamento di website, pinta, y escultura. E luna venidero lo tin un tayer di Art & Fashion duna pa Glenda Heyliger cu lo cuminsa 3 di October.

‘Un experiencia nobo y unico den arte’
 Razia Barsatie su concepto principal pa loke tabata e tayer aki ta pa experimenta cu cuminda y spices. E disciplina di arte tabata pinta, dibuho y video animation.

“E tabata un experimento mix hopi interesante y na e expo aki bo lo por mira tres diferente trabao, y tur cos lo wordo exponi for di kico nan a cuminsa cune te na resultado final,” Chrislene ta bisa. Tur siman algo diferente a wordo haci, un cuminda diferente a wordo traha y purba pa e participantenan, anto a base di e cuminda ey nan a traha e obra di arte.

“Mi ta haya cu tin hopi creatividad na Aruba, y e isla ta purba di keda creativo por medio di Atelier cu ta trece e tipo di hendenan aki hunto via actividadnan pa asina siña y descubri cosnan nobo,” Razia ta bisa.

Bruce Stamper, un di e participantenan di e tayer cu lo mustra su obranan tambe den e expo, ta bisa cu loke el a siña ta bo ta bin hunto como grupo di 12/13 artista pa crea un expo hopi bunita, “y mi ta sigur cu e ta bay ta hopi bunita pasobra tur e artistanan akinan ta trahando obranan excepcional.” Semper por tin mas espacio pa mehoracion, segun Bruce, den tur clase di arte. Na Aruba nos tin un posibilidad y esnan cu ta interesa den serio por atende na Ateliers’89 pa por sigui expande nan conocemento den arte. “Aki na Aruba e conocemento ta hopi bon pero ta yega momento cu bo tin cu sali for di bo isla pa siña conoce otro cultura pa expande bo conocemento pasobra e mundo aki ta hopi grandi,” Bruce ta expresa.

Traha portfolio cu Ateliers’89
 “Tur tayer ta diferente y tur docente ta maneha nan tayer na un manera diferente. E idea di Ateliers ta pa hopi mucha cu kier tuma un otro richting – sea nan kier bay haci algo mas creativo manera bira un artista, y nan no sa ki tipo di arte nan kier practica. Mi ta bisa cu Atelier ta un plataforma perfecto pa bin experimenta y siña,” Chrislene ta splica.

No ta rekeri pa bo tin algun habilidad caba, pero por ehempel si bo kier bin pa e curso di traha website bo lo mester un laptop, pero hasta asina tin material cu por wordo fia. E idea ta cu hopi muchanan ta bini y si bo participa den mayoria di e tayernan durante aña bo lo por crea un portfolio, y a base di esaki despues di dos aña bo lo por meld na un scol di arte na Hulanda of na Merca.

“Nos tin hopi mucha cu a traha portfolio na Atelier cu no a caba un MAVO of HAVO, anto cu tog a haci un 21 Toetstest anto a logra.” Esey ta e meta na Ateliers pa yuda esnan cu kier sigui un carera den fotografia of nan kier bay mas den un carera di video animation.

Si bo haci tur e tayernan of mas cu bo por, bo lo logra colecta diferente conocemento y sabiduria, mas habilidad pa bo por siña desaroya bo talentonan mas den varios aspecto. E tayernan ta bastante standard den loke ta orario y dia, tur luna nan tur ta di 6:30pm pa 9:30pm, tur ta di Dialuna pa Diahuebs cu un largura di cuater siman largo. Sigui Ateliers’89 riba Instagram y Facebook pa asina bo keda informa riba e tayernan y con bo por join via elvis@ateliers89.org of si bo kier yama of WhatsApp na 565 4613.