Un bom a explota dilanti e porta di universidad di Kabul, na e capital di Afganistan, matando 8 persona y heridando 33 persona, segun polis.
Varios di e heridonan ta den un estado critico. Ningun grupo a responsabilisa pa e atake. Grupo Taliban manera grupo di estado Islam sa bombardia e ciudad, den escala grandi. Taliban generalmente ta ataca forsa di Afganistan y trahado di gobierno.
E explosion tambe a pone cu dos auto a cende candela. No ta cla ainda si raiz di e atake di terorista suicida of un bom cu a ser pone na distancia, Vocero di Polis, Ferdous Faramarz a bisa.
Vocero di Ministerio di Salud, dr. Wahidullah Mayar, a publica tocante e victimanan bisando cu ‘tur pashent herida ta evacua na nos hospital y ta ricibiendo tratamento necesario’. Despues di informe inicial di 6 morto, Mayer a bisa cu otro 2 persona a muri pa causa di herida y cu e number a aumenta pa 33.
E universidad tin varios departamento unda studiante ta keda den zomer pa asisti les of ta traha den proyecto di investigacion. E universidad ta mixto, unda cu hende muhe tambe por studia, algo cu Taliban ta contra.
Massoud, un profesor di economia di universidad a bisa cu varios abogado tabata haciendo nan examen pa bira hues ora cu explosion a pasa. No ta cla si e abogado tabata obhetivo. Vocero di Taliban Zabihullah Mujahid a bisa cu e no sa di e participacion di Taliban na atake di diabierna.
