E siman aki, minister demisionario di Husticia y Asuntonan Social, Sr. Rocco Tjon a reuni cu e ekipo multidisciplinario di expertonan for di Instituto Pedagogico Arubano y Vrije Universiteit Amsterdam, kende a percura pa encuesta hobennan a traves di un lista di pregunta. E preguntanan aki ta enfoca riba e contexto escolar, esun di bario, esun di cas y por ultimo nan bienestar fisico y mental.
Pa haci e investigacion mas completo a papia tambe cu mayor, directiva, maestro y trahadonan social, den tur e diferente districtonan. Riba nos peticion a inclui tambe recomendacionnan specifico pa por duna un respuesta na e hallazgonan di e investigacion. E recomendacionnan aki lo wordo presenta dentro di poco na Conseho di Minister.
“Ya caba den presupuesto 2025 tin fondonan adicional aloca pa e sector social, y nos lo boga pa esaki keda asina tambe pa di e forma ey e recomendacionnan concreto por wordo realisa,” segun un comunicado di gobierno. “Nos ta gradici henter e ekipo cu a haci e investigacion aki, cu ta hopi importante pa e futuro di Aruba, un realidad.”
