Medionan estatal Ruso y esunnan cu ta sostene presidente Vladimir Putin ta entamando un campaña di noticia cu meta pa socava confiansa publico den e habilidad di sistemanan di salud Europeo pa maneha coronavirus, segun un analisis di Union Europeo.
E reporte, mira pa AP, ta bisa cu expertonan di UE a nota casi 80 instancia di desinformacion relaciona cu e virus durante e ultimo dos luna, incluyendo declaracion cu COVID-19 tabata un arma biologico fabrica pa occidente.
“E campaña ta diseña pa exacerba confusion, panico y miedo, y preveni hende di haya acceso na informacion confiabel tocante e virus y provisionnan di siguridad publico”, segun e reporte, compila pa division di comunicacion di UE asigna pa combati informacion falso.
Expertonan di UE a acusa noticieronan Russia Today, Sputnik, Oriental Review, Geopolitica y otronan. Como ehempel di reportenan falso, nan a cita storianan bisando cu COVID-19 tabata menos dañino cu grip, desaroya pa Merca, treci na Europa a traves di migrantenan, of exacerba door di bebe ibuprofen pa alivia sintoma.
Expertonan di desinformacion a bisa cu Rusia poco poco a kibra imagen di UE desde 2014 door di duna sosten na partidonan ultra-derechista y anti-Europeo, y tambe door di ataca integridad di medionan di comunicacion di coriente principal. E virus expandiendo rapidamente por provee un caminda nobo pa haci esaki.
Cuatro biaha mas buskeda di internet tocante e virus tabata tumando luga na maart cu na fin di januari, y dobel e cantidad ta tumando luga awo, compara cu fin di luna pasa segun e reporte di UE. Monitornan di rednan social y digital ta calcula cu a menciona coronavirus alrededor di 115 miyon biaha online entre dia 1 di januari te cu 12 di maart ultimo.
E reporte, di division di Comunicacion Strategico di Union Europeo, a bisa cu RT Spanish ta e di 12 fuente mas popular pa contenido relaciona cu coronavirus a traves di varios idioma, incluyendo Ingles, Spaño, Ruso, Italiano y Arabe, mas popular hasta cu noticieronan internacional mayor.
Mensahenan na Spaño tabata enfoca riba hende na Europa y Latino America pa ‘avansa storianan apocaliptico, culpa capitalistanan pa purba di beneficia cu e virus, y enfatisa con bon Rusia y Putin ta manehando e brote’, segun e reporte.
Rusia a confirma un total di 199 caso di virus. Sinembargo, hopi experto di salud ta predeci e cifra hopi mas halto, cu infeccion kedando sin detecta ya cu no ta test ampliamente pa e virus.
Vocero di minister di Exterior Ruso, Maria Zakharova, ayera a rechasa e declaracionnan di UE tocante desinformacion proviniendo di Rusia, tachando nan di ‘fake news’ y sugeriendo cu tabata parti di un campaña di desprestigio contra e pais.
Zakharova a bisa cu UE ta gusta culpa Rusia pa tur su problemanan y a exigi prueba di e acusacionnan den e reporte, bisando, ‘si no tin evidencia, ta imposibel pa acusa y pa conduci un campaña di informacion asina agresivo, cu ta casi un atake’.
“Nos ta pidi coleganan di Brussels pa stop usa memes tocante e supuesto menasa Ruso y enfoca den e situacion dificil aki riba yuda Italia, Spaña y otro paisnan di UE cu ta sufriendo di coronavirus”, el a bisa.
Vocero di Comision Europeo, Peter Stano a bisa diaranson cu e origen di hopi desinformacion di coronavirus cu ta comparti ta ‘sea na Russia of por track esaki na un noticiero cu ta obviamente, y a ser exponi den pasado, como pro-Kremlin’.
Stano a bisa cu tin noticia falso originando na luganan otro cu Rusia, pero no a nombra ningun. “Pero sea ken ta plamando desinformacion ta esencialmente hungando cu bida di hende”, el a bisa.
