Expertonan di Organisacion Mundial di Salud ta programa pa yega China awe pa un investigacion hopi anticipa riba e origen di pandemia di coronavirus, segun gobierno Chines a bisa e siman aki.
E expertonan lo yega awe y reuni cu nan contraparte Chines, e Comision Nacional di Salud a bisa den un declaracion di un frase cu no a duna mas detaye.
No tabata inmediatamente cla si e expertonan lo biaha na e ciudad central di Wuhan, unda a detecta e coronavirus pa prome biaha na fin di 2019.
Negociacionnan pa e bishita tabata programa pa largo. Director general di WHO, Tedros Adhanom Ghebreyesus a expresa decepcion siman pasa pa e retrasonan, bisando cu miembronan di e team cientifico internacional saliendo di nan pais ya a cuminsa nan biahe como parti di un acuerdo entre WHO y gobierno Chines.
Vocero di ministerio di Exterior, Zhao Lijian a bisa cu China a aproba e bishita despues di consulta entre e bandanan y a yam’e un oportunidad pa ‘intercambia idea cu cientifico- y expertonan medico Chines riba cooperacion cientifico pa track e origen di e coronavirus nobo’.
Gobierno Chines a controla estrictamente tur investigacion riba origen di e virus na cas, un investigacion di AP a haya, mientras medionan di comunicacion estatal a destaca teorianan marginal cu ta sugeri otro origen pa e virus.
E investigacion di AP a haya cu gobierno Chines ta otorgando centenares di miles di dollar pa cientificonan investigando origen di e virus den sur di China. Pero ta monitor nan hallazgonan y obligando pa publicacion di data of investigacion mester ta aproba pa un task force nobo maneha pa gabinete Chines, bao orden directo di presidente Xi Jinping, segun documentonan interno obteni pa AP.
Origen di e virus ta fuente di speculacion intenso, mayoria di esaki centra rond di e probabilidad cu vleermuis a carga e virus y a pas’e na humano mediante un especie intermediario bendi como cuminda of remedi na mercadonan tradicional Chines.
China en gran parti a stop casonan nobo di transmision domestico, pero dialuna a bisa cu cantidad di hende a test positivo na provincia Hebei, frontera cu Beijing. E brote ey ta yega memey di medidanan pa combati transmision durante dia festivo di Aña Nobo Lunar proximo luna. Autoridadnan a pidi ciudadanonan pa no biaha, ordena scol cera un siman trempan, y haci test den escala masivo.
E brote na Hebei a duna preocupacion particular pa motibo di e cercania di e provincia cu Beijing. Parti di e provincia ta bao lockdown y a stop biahe interprovincial, cu esnan yegando Beijing mester mustra prueba di empleo y prueba di bon salud.
