(AP) – Merca ta preparando pa un temporada di hopi griep ademas di e crisis di COVID-19 cu ta continuando, cu un peticion na tur Mericano pa vacuna contra tur dos malesa.
“Nos ta compronde, nos tur ta cansa di papia tocante vacuna,” Dr. Rochelle Walensky, director di Centers for Disease Control and Prevention, a bisa.
Pero “ta hopi mas importante e aña aki” pa ricibi e vacuna contra griep, Walensky a agrega, ken a ricibi su mesun vacuna anteriormente e siman aki, mescos cu e tin custumber desde cu e tabata un studiante medico den aña 1995. “Nos ta preparando pa e regreso di griep.”
Casonan di griep a baha na nivelnan historicamente abao durante e pandemia, den bista cu restriccionnan diseña pa combati e plamamento di e coronavirus, a yuda tambe blokia otro virusnan respiratorio. Pero cu scolnan habriendo atrobe, negoshinan y biahenan internacional tambe habriendo back cu hopi menos uso di tapaboca, no tin manera di por premira con severo e temporada aki lo ta pa cu griep.
Pero oficialnan ta preocupa pa motibo cu un virus cu ta afecta e sistema respiratorio, yama RSV, cu usualmente ta ataca muchanan den e temporadanan aki, a cuminsa ataca desde tempran e aña aki ora cu e uso di tapaboca a cuminsa baha.
“Nos no sa si e ta e comienso di un temporada pio di influenza, pero nos sa cu certeza cu nos no kier un dobel pandemia, di ambos COVID y influenza,” Dr. William Schaffner di e National Foundation for Infectious Diseases a bisa.
Y si ainda mester ricibi e vacuna di COVID-19, sea cu ta e prome, di dos of di tres dosis, bo por ricibi esaki durante e mesun cita pa un vacuna contra griep.
CDC ta recomenda un vacunacion anual contra griep pa practicamente tur hende, cuminsando cu babynan di 6 luna en adelante. Influenza ta specialmente peligroso pa adultonan mas grandi y muchanan di menos di 5 aña, hende cu problemanan di salud cronico manera diabetes, asma, problemanan di curason y durante embaraso.
Aña pasa, mas o menos e mesun cantidad di Mericano a ricibi nan vacuna di griep di mesun manera cu nan a haci prome cu e pandemia, mas o menos mita di e poblacion eligibel segun datonan di CDC lansa riba diahuebs. Pero Walensky tabata desapunta pa e nivelnan mas abao den vacunacion di muchanan contra griep aña pasa, y pa e diferencia cu tin entre e rasanan. Aña pasa, 43% di e Mericanonan color scur y 45% di e personanan Latino a ricibi un vacuna contra griep, compara cu e 56% di e Mericanonan blanco.
CDC ta premira cu e fabricantenan di e vacuna lo entrega 188 pa 200 miyon dosis di e vacuna contra griep. Mayoria di Mericano cu seguro lo ricibi uno sin costo. Opcionnan ta inclui un vacuna regular, vacuna pa duna adultonan mas grandi cu proteccion extra, y un spray nasal. Tur otro proteccion contra tur 4 diferente variante di e griep cu expertonan ta premira lo ta e mas probabel di plama e aña aki.
Na mesun momento cu nan vacuna contra e griep, e oficialnan tambe ta urgi e adultonan mas grandi y hendenan cu malesa cronico pa puntra tocante ricibi un vacuna contra un tipo di pneumonia cu frecuentemente ta un complicacion.
