Expertonan ta bisa cu pasa demasiado tempo riba rednan social por ta dañino pa salud mental, specialmente si ta consumi demasiado noticia negativo.
Bo ta haya bo mes ta desperdicia cantidad di ora online? Nos tur a haya nos mes den e situacion aki. Bo ta cay riba cama, gara bo celular, habri rednan social, y proximo cos cu bo ta ripara, oranan a pasa. Esaki ta wordo denomina ‘doomscrolling’.
E Counseling and Wellness Center (CWC) di Pittsburgh a bisa KDKA cu e pandemia a registra mas hende online. “Hende ta djis adicto. Nos no por stop”, segun Nicole Monteleone, co-fundador di e CWC.
Monteleone a bisa cu e motibo cu hende ta scroll sin fin pa noticianan negativo ta pasobra ‘nos ta programa pa esaki na un nivel evolucionario, pasobra si nos siña tocante e cosnan grandi cu ta duna miedo, of nos haya e contestanan, nos por controla nos entorno’.
Segun expertonan, doomscrolling por conduci na ansiedad, depresion y fatiga. Pero tin forma pa evita esaki.
Dr. Candice Biernesser, un psikiatra na Universidad di Pittsburgh, a bisa cu ‘loke realmente tin un impacto ta kico bo ta haci ora bo ta online’.
Biernesser ta recomenda pa identifica bo triggernan, saca esakinan for di bo timeline, y tene na un schedule di rednan social. “Tin investigacion cu ta indica cu uso di rednan social pa un ora of mey ora prome cu drumi por tin impacto riba disrupcion di bo drumimento durante henter anochi”, segun Biernesser.
Expertonan a bisa KDKA cu transmision di positividad ta cuminsa cu bo, pues ta recomenda pa post algo pa curasha otronan proximo biaha cu bo log on.
