Residente di Sidney mester prepara pa ‘perdida sin precedente’ na medida cu candela forestal ta yega na suburbio den fin di temporada. Advertencia ta bin di ex hefe di bombero, Greg Mullins.

E ta bisa cu Sidney probablemente lo experimenta un devastacion pio cu 1994, ora cu a perde centenares di cas suburbano. “Lo pio ainda ta na caminda, pasobra ta bay bira mas calor y mas seco. No tin perspectiva pa awasero.”

Lo bay tin candela masivo cu ta ‘demasiado grandi pa paga sin awasero’. “Nan lo bira mas grandi y lo yega suburbio di Sidney, costa sur y central.”
Seis persona a perde nan bida na New South Wales te awo e temporada aki, y mas di 680 cas a keda destrui pa motibo di candela.

“Candela no a yega na suburbio di Sidney ainda. Hende mester prepara nan mes. Ta bay tin perdida sin precedente, candela sin precedente, problema di salud cu huma, ola di calor y e ciencia ta cla – tur esaki ta pa motibo di clima mas cayente”, el a bisa.

Nan ta bisa cu e ta preparando pa bira un di pio temporada di candela den Australia su historia. Mas di 2.000.000 hectar di tereno a kima te awo, y tin mas di 80 candela ainda activo. Tin casi 3.000 bombero na New South Wales cu sosten di aeronave cu awa.

Mullins ta preocupa con boluntario lo por maneha e situacion ora cu e clima bira mas cayente na januari y februari. “Tur hende ta desgasta bastante y den mi experiencia, aki ta unda tur cos ta bay malo”, Mullins a bisa. E ta bisa cu prome minister Scott Morrison por coordina cu hefe di brandweer y no gasta mas avion di extincion.

Departamento di Medio Ambiente di NSW a bisa cu ta spera cu huma persistente despeha un poco, sinembargo dokter ta adverti cu persona por sufri di impacto riba salud respiratorio a largo plaso for di inhala e capa toxico di e huma.

Nivel di contaminacion di Sidney a alcansa e ekivalente di huma 10 sigaria. E calidad di aire na sur oriente di Sidney ta 5 biaha pio cu nivel di ‘peligroso’. “Nos mester reduci keintamento global pa dos grado. E unico forma pa haci esaki ta reduci nos emision di carbon”, minister di medio ambiente, Matt Kean a bisa.

“Cientifico ta pronosticando durante decada cu cambio climatico lo ocasiona evento climatico mas extremo”, Kean a bisa. El a bisa cu mas dia di calor lo bin, cu menos awasero, mas secura, calidad malo di aire. “Esaki ta locual cientifico ta bisa cu cambio climatico ta. Si esaki ta cambio climatico – y si esaki no ta cambio climatico, kico lo pasa ora esaki yega?”