E cantidad di morto pa COVID-19 lo aumenta na Latino America den e proximo 3 pa 6 siman, asina a confirma e director di Organisacion Panamericano di Salud (OPS), asina como tambe a declara cu tur cos ta depende di e cumplimento di medidanan pa evita e contagio y di e recursonan disponibel.
Carissa Etienne, titular di oficina regional di Organisacion Mundial di Salud (OMS) a bisa cu e impacto sanitario di e coronavirus nobo no lo bay ta igual na tur e pais di Latino America, pero cu hopi di nan lo cuminsa wak un number mayor di personanan infecta na final di april y comienso di mei.
“Pero claro, cu esaki ta depende di con e paisnan ta cumpli cu distanciamento social, si nan ta dispuesto pa continua cu e medidanan aki, si nan tin suficiente trahadonan di salud y suficiente camanan di hospital, specialmente den cuidado intensivo, y si nan ta conta cu suficiente mashinnan di hala rosea y material di proteccion personal” Etienne a señala den un conferencia di prensa via video.
Coronavirus nobo a provoca mas di 80.000 morto y 1,4 miyon di persona contagia na henter mundo desde cu a ser reporta e prome caso na China na luna di december.
Desde e comienso di epidemia, Latino America y Caribe ta suma 1.466 fayecido y 37.545 caso, segun AFP a afirma diamars ultimo.
“Den solo shete dia, nos a mira con e casonan y mortonan a duplica den nos region. E pandemia ta bay hopi lihe”, el a bisa.
“E situacion lo bira pio prome cu lo mehora, y nos tur mester keda prepara pa den proximo siman e situacion lo ta mas dificil”.
