Universidad di Corsou cu antes tabata ‘Universiteit van de Nederlandse Antillen’ a acerca sra. ing Yvonne Webb-Kock, cu ta nos experto local na Aruba, pa ta e docente pa e materia “Arkitectura di Aruba”. Actualmente varios maestro riba e islanan Aruba, Bonaire, Curaçao y St. Maarten ta sigui conhuntamente un estudio na Universidad di Corsou di masters den e materia di lenguahe cu e modula “Educacion Den Herencia”. Studiantenan ta maestro caba, pero ta eleva nan grado riba nivel di masters cu e estudio aki.
Sra. ing. Webb-Kock ta un graduado nominal di e universidad aki y actualmente ta eherciendo e funcion di director na Monumentenbureau, esaki ta departamento di gobierno cu ta encarga cu nos monumentonan. Minister di Asuntonan General, sr. mr. M.G. Eman a duna su aprobacion pa sra. ing. Webb-Kock por a eherce e les aki pa asina por contribui na educacion na nos maestronan cu awo nan turno por traspasa e materia aki na nos siguiente generacion.
E les riba nivel di masters a tuma luga na IPA y pa medio di “livestream” conhuntamente tur islanan a sigui riba e materia. A presenta e tema di arkitectura cuminsando for di aña 1750 te na arkitectura moderno y alabes a pone enfasis riba algun obranan di nos arkitectonan di Aruba. E studiantenan/maestronan y e organisado di e estudio di Universidad di Corsou a keda hopi impresiona cu e materia y e duna elogio pa sra. ing. Yvonne Webb-Kock pa su bon trabaonan cu e ta eherciendo pa e arkitectura di Aruba.
