Un investigado di siguridad cibernetico Britanico, conoci pa stop un virus di computer mundial, a declara su mes culpabel di desaroya malware pa horta informacion bancario.
Fiscal federal na Wisconsin, y e abogadonan di Marcus Hutchins, ta bisa den un declaracion conhunto na corte cu e hoben di 24 aña di edad a bay di acuerdo pa declara su mes culpabel di desaroya e malware, yama Kronos, y conspira pa distribui esaki entre 2012 y 2015. A cambio di su declaracion den e cargonan aki, fiscal a elimina ocho cargo mas.
“Manera boso por sa, mi a declara mi mes culpabel na dos cargo relaciona cu skirbi malware den e añanan prome cu mi carera den siguridad”, Hutchins a bisa riba su website. “Mi ta arepenti di e actonan aki, y mi ta acepta responsabilidad completo pa mi erornan. Awo cu mi a crece, mi ta uzando e mesun habilidad cu mi a uza pa malo algun aña atras, pa proposito constructivo. Mi lo continua devota mi tempo pa tene hende safe di atakenan di malware.”
Hutchins ta enfrentando 10 aña di prizon, pero lo por ricibi un sentencia mas suave pa acepta responsabilidad, e declaracion na corte a bisa. Abogadonan a bisa cu Hutchins ta compronde cu e lo por wordo deporta. No tin fecha pa sentencia ainda.
Aresto di Hutchins na Las Vegas na augustus 2017, mientras e tabata cla pa subi un avion pa bay Inglatera, tabata un shock; apenas algun luna atras e tabata un heroe, door di a haya un ‘kill switch’ pa e virus WannaCry, cu a kibra computer mundialmente. E tempo ey, el a bisa AP den un entrevista cu e no tabata considera su mes un heroe, pero tabata combati malware pasobra ta ‘lo correcto’.
Fiscal a bisa cu Hutchins a haci declaracionnan incriminante durante un interogacion di dos ora, y despues durante un yamada cual Hutchins tabata sa tabata wordo graba, el a bisa un persona cu e ‘tabata skirbi malware’ añanan atras.
Fiscal a bisa cu Hutchins a bende e software Kronos na un hende na Wisconsin, y cu el a ‘entrega personalmente’ e software na un persona na California. E malware tabata diseña pa ‘intercepta comunicacion y colecta informacion personal, incluyendo nomber di usuario, password, adres di email, y data financiero’ di computer, segun fiscal.
Kronos a ‘wordo uza pa infecta cantidad di computer rond mundo y horta informacion bancario’, fiscal a bisa, sin duna un cantidad exacto. No ta conoci cuanto ganashi Hutchins a haya for di e malware, pero chat online intercepta pa FBI na november 2014, Hutchins a lamenta cu el a haya apenas $8000 di cinco benta. Hutchins a bisa cu el a kere cu lo gana como $100,000 pa luna di benta di Kronos cu un di su co-conspirador, kende no ta nombra den e acusacion.
Inicialmente, Hutchins a declara su mes inocente di tur acusacion y lo mester a bay huicio den juli. Mientras su caso ta pendiente, fiscal a prohibi e di bolbe su pais. E tabata biba na California, trahando como consultant di siguridad cibernetico.
