Como parti di cooperacion entre Aruba y Hulanda por medio di e Landspakket, for di Autoriteit Consumenten en Markt (ACM) di Hulanda, diferente experto lo bin Aruba den diferente fase pa asisti Aruba Fair Trade Authority (AFTA) den diferente area di trabao.
Recientemente un experto di ACM riba tereno di competencia a bin Aruba pa asisti AFTA den desaroyo di precondicionnan pa e maneho di competencia. E trabao di e experto aki lo dura tres luna y despues otro experto lo bin Aruba pa sigui brinda asistencia na AFTA riba otro area di trabao. TWO-Hulanda ta financia e asistencia di e expertonan, cual lo fortifica e funcionamento di AFTA.
Despues cu 1 di december 2023, Minister di Asunto Economico, Comunicacion y Desaroyo Sostenibel, mr. Geoffrey Wever, a inaugura Aruba Fair Trade Authority den centro di Oranjestad y 1 januari 2024 e Ley di AFTA tambe a bay na vigor pa asina e autoridad di competencia husto por inicia su tareanan.
AFTA, como un organisacion independiente (zelfstandig bestuursorgaan), cu su mesun directiva, tin como tarea principal e ehecucion di e ley di ordenansa nacional encuanto competencia husto (mededingingsverordening). E meta di e ordenansa nacional di competencia husto ta pa garantisa un desaroyo economico husto y stipula regla encuanto acuerdonan cu ta limita competencia (mededingingsafspraken) y posicion di poder (machtspositie), como tambe stipula regla pa cu supervision riba concentracion di empresanan.
Fin di januari 2024 Minister Geoffrey Wever a haci un biahe ehecutivo pa Hulanda pa reuni cu expertonan Hulandes di Autoriteit Consumenten en Markt (ACM) over diferente area di colaboracion. Tambe a inicia e preparacionnan di e ley pa inclui proteccion di consumidor bao di AFTA su responsabilidadnan. E ley aki ta den fase final di preparacion cu intencion cu pa 2025 AFTA lo tin e responsabilidad adicional pa reglamenta y informa riba tereno di proteccion di consumidor.
Pa mas informacion over di e responsabilidadnan y tareanan di Aruba Fair Trade Authority (AFTA) por bishita nan webiste www.afta.aw
