Pa por abastece Aruba di webo y despues galiña barata pa sopi, mester aloca por lo menos 50 mil meter cuadra di tereno en total. Un produccion di webo exitoso ta rekeri maximo tres galiña pa cada meter cuadra y na e momentonan aki no ta mustra cu tin suficiente tereno disponible pa esey.

“A lo menos cu cuminza usa e buraconan grandi cu a saca piedra y santo,” Francis Wever a bisa Bon Dia Aruba.

Francis Wever sa di kico e ta papia. Pa hopi aña, su negoshi, Santa Helena Chickenfarm tabata percura pa cumpli cu necesidad di webo pa henter e isla, te hasta pa islanan di Corsou y Boneiro. Su chickenfarm tabata percura pa exportacion. Y motibo pakico cu e chickenfarm por a produci asina bon tabata pasobra a inverti den conocemento.

Wever a tuma contacto cu Bon Dia Aruba despues di a lesa e comentarionan di mr. David Kock, kende a ilustra e retonan pa agricultura y cria na Aruba. Kock a mustra cu locual falta na Aruba ta conocemento, espacio y financiamento pa un tipo di actividad empresarial cu no tur ora por duna garantia di produccion. E excepcion, den concepto di David Kock, ta produccion di webo, aunke cu el a señala cu dificilmente productornan chikito por competi cu e prijs di webo importa.

Ley di proteccion ta pa yuda comunidad

Y aki ta unda e ley di proteccion ta hunga un rol, Francis Wever a bisa. “Hopi hende ta pensa cu e Ley di Proteccion ta pa yuda e empresario. E no ta asina. E ley aki ta pa yuda e consumidor local, cu por ta sigura di su producto na un prijs competitivo. Ademas, tempo di Santa Helena Chickenfarm, comunidad tabata por a cumpra e galiñanan cu ya no ta produci webo na solamente un florin, cu tabata hopi bon pa nan por traha sopi. Nos tabatin hasta e posibilidad pa cumpra 10 galiña y haya un por nada,” Wever a splica. E sistema di opera asina aki tabata yuda e empresa, pero tambe comunidad cu tabatin garantia di webo fresco y cuminda relativa barata

E Ley di proteccion tabatin su funcion, esta pa permiti e chickenfarms na Aruba haya oportunidad di crece y nivela e prijs di webo compara cu esun importa. Pa e motibo ey e proteccion a bin.

E tempo ey caba webo local tabata costa cinco florin pa dozijn, Wever ta bisa. Pero pa motibo cu a bin cu e ley di proteccion, a permiti e empresarionan aumenta nan produccion door di amplia nan volumen. “Asina pueblo por a haya su galiña fresco na un prijs economico.”

Ademas, tabatin un chickenfarm den cada districto y no tabata hopi keho di molester di holo pasobra tur productor tabata tene su luga limpi. Awendia ta kere cu por djis duna galiña cuminda cu awa y ta lubida e otro trabaonan. “Bo luga mester ta limpi, pasobra mester evita e malesa salmonella tambe. E tin su principionan cune.”

Divisa

Pero otro aspecto hopi importante ta cu actividad di chickenfarm cu ta abastece Aruba cu su mesun webonan, ta yuda den baha e presion riba divisa. “Si tuma awendia, Aruba tabata importa 8 mil dozijn di webo pa dia. Si tum’e na dos florin mes, ta nifica cu diariamente tabata sali 16 mil florin na divisa for di Aruba. Door di produci na Aruba, ta spaar hopi divisa, ta haya producto mas fresco, na un prijs similar cu esun importa.” Wever a bisa cu observando e desaroyo, e por conclui, mescos cu David Kock a haci, cu e prijs di webo importa cierto momento tabata hasta mas halto cu webo local. Kock a bisa Bon Dia Aruba cu entretanto e prijs a baha. “Tabatin bentaha pa pone e proteccion. Ta scapa divisa, tin webo fresco competitivo y pueblo por a haya su galiña pa sopi na prijs economico. Awendia, si mester busca un galiña, si haya uno, e ta costa te hasta 25 florin.”

Santa Helena Chickenfarm mester a cera

Motibo pakico Santa Helena Chickenfarm mester a cera ta varios. Prijs di webo e tempo ey a keda pega na e mesun suma pa 14 aña y e tempo ey, e Minister di Economia Robertico Croes a nenga pa permiti un aumento. “Riba dje, su mesun famia tabata den importacion di webo.” Y esey a contribui cu e ganashinan di Santa Helena Chickenfarm a cay drasticamente cu no a hacie atractivo mas.

“Tabatin un tempo cu Aruba tabata hasta exporta webo. E webonan tabata bay Corsou cu ferry, pero despues a negocia prijs special cu ALM pa hiba webonan pa Corsou y Boneiro. E tarifa economico aki tabata pa stimula exportacion of comercio entre e islanan. Nos tabata hasta exporta webo pa St. Maarten, cu avioneta. Aruba tabata e lider den produccion di webo entre islanan.”

Exportacion a stop door cu turismo a sigui crece. Pero en bes Aruba ta sikiera produci 90 porciento di su necesidad y importa unicamente 10 porciento, e ta net lo contrario pasobra poco hende kier bay den volumen. “Nos tabata usa 200 saco di maishi di 50 liber pa dia. Cua fabrica no kier bende e cantidad ey. Door di bay grandi bo ta haya miho prijs.”

Aruba a laga su produccion propio bay

Contrario cu awor ta e caso. Awor aki tin como cinco of seis compania chikito cu ta produci webo y ta keda contento cu ta bende nan cahanan di webo na cinco a seis florin, pero toch ta laga un necesidad pa Aruba importa 90 porciento di locual mester di e producto. Meta di proteccion tabata pa pueblo en general y no pa un grupito cu ta produci pa solamente 10 porciento di e mercado, unda e prijs ta mas halto ainda. Esey nunca tabata e meta di e ley di proteccion, Wever a conclui.

Den otro palabra, den concepto di Francis Wever, Aruba a laga un industria bay. “Mi a tende Minister President, cu tur respet, bisa cu Aruba tin necesidad pa chickenfarm grandi, pero nos tabatin esey. Pa motibo di politica e mester a cera. Y awor aki, e ley di proteccion ta traha net lo contrario. Pasobra su intencion ta pa yuda amplia e volumen y no pa productornan probecha di dje sin yuda e comunidad.”