E estudio piloto involucrando tapaboca obligatorio den varios parti druk di Amsterdam y Rotterdam ta mustra cu e uso di tapaboca no a conduci na ningun cambio di comportamento, tampocon na un reduccion den cantidad di bishitante, segun e investigadonan a bisa ayera.
A introduci e rekisito di tapaboca na cayanan di tienda, mercadonan y red light district na Amsterdam na augustus, despues di un aumento grandi den e cantidad di test positivo di coronavirus den e dos ciudad Hulandes mas grandi.
Hende cu a nenga di bisti un tapaboca tabata enfrenta un multa di 95 euro.
Investigadonan na Instituto pa Estudio di Crimen y Cumplimento di Ley di Hulanda a analisa video di camara di vigilancia y a compara e resultadonan cu areanan unda tapaboca no tabata obligatorio. Nan a haya cu na momento cu a cuminsa cu e piloto, 55% di hende a bisti un tapaboca, pero cu esaki a aumenta na 75% pa fin di luna. Sinembargo, un tercer parti di hende bistiendo un tapaboca no a bistie corectamente riba tanto boca como nanishi, segun e investigadonan.
Na mes momento, no tabatin un diferencia real den e cantidad di hende bishitando cualkier di e luganan unda tapaboca tabata obligatorio, ni riba con bon nan tabata cumpli cu regla di distanciamento social di 1.5m. Propietarionan di tienda a keha cu nan benta a cay hasta 40% den areanan unda tapaboca tabata obligatorio.
Rotterdam y Amsterdam a ricibi permiso di gobierno nacional pa introduci tapaboca den areanan druk na cuminsamento di augustus, mientras nan cantidad di infeccion di coronavirus a aumenta drasticamente, pa mira ki efecto nan tabatin riba distanciamento y consciencia publico.
Instituto di Salud RIVM nunca a apoya e uso di tapaboca no-medico, y gobierno na luga di esey a enfatisa e importancia di limita bishitantenan na cas y tene un distancia di 1.5m.
