18Aug EdM Rescate Mucha (1).jpg

Despues di un siman hopi intensivo den MFA Noord, yena di diferente topico, diabierna ultimo e participantenan di Expedicion Rescate Mucha a ricibi nan certificado di participacion. E proyecto aki a cay bou coordinacion di Shailiny Tromp-Lee, hefe di seccion di investigacion y documentacion di Departamento di Cultura Aruba (DCA) y lider di proyecto tabata Afranina Henriquez. Alabes a forma parti di e team di ehecucion Maria Ridderstaat y Richard Deluvia, ambos ta trahado di e seccion di investigacion y documentacion.

 

E hobennan a cuminsa dialuna cu e tayer di Historia Oral, caminda e hobennan a cera conoci cu e metodo aki y mediante rollenspel a haya chens pa practica e tecnica di haci entrevista cu un grandi. Pa e parti aki DCA a acerca Faritah Luidens cu mesora tabata dispuesto pa coopera cu e proyecto aki. Un danki di curason na su persona pa e cooperacion di semper. Dialuna tabata dirigi primordialmente riba e parti di conscientisacion caminda a pone e enfasis pa curasha e muchanan pa ta caweta. Caweta pa sa mas di nan historia, nan cultura, nan herencia. Pa medio di siña conoce esakinan, ta yega na aprecia y por crea stimacion cu ta yena bo cu orguyo cual na su turno ta fomenta e sentimento di kier cuida, proteha y conserva loke ta di nos.

 

Curso a sigui diamars caminda nan a haya tayer di fotografia for di Ayrton Tromp y despues nan por a practica loke nan a siña rond di e edificio di MFA Noord. Sigur un curso cu a cende un candela den hopi di e hobennan y mesora nan a cuminsa tene e camara hopi mas den man. Parti atardi nan a bay di bishita na Museo Historico y Biblioteca Nacional cual nan sigur ta luganan caminda nan por haya hopi informacion di nos historia, cultura y herencia.

 

Diaranson e hobennan a cuminsa cu e curso di filmacion, duna pa medio di Ricardo Ridderstaat, caminda nan a haya un parti teoretico y a finalisa cu un parti practico caminda nan a keda reparti den 3 grupo cu mester a traha ariba diferente tarea. Un grupo mester a traha un segmento di noticia, otro un comercial y e ultimo un pelicula cortico. Sigur e tabata un desafio pero tur tres grupo a logra cumpli cu e tarea. Parti atardi a cuminsa prepara pa e entrevista cu algun grandi riba diahuebs y diabierna, cual ta repasa e bishita social cu a tuma luga caba cu e trahadonan di DCA y a traha e lista di pregunta. Punto di salida tabata pa laga e muchanan mes stipula loke nan kier puntra e grandinan.

 

Diahuebs casi henter dia e diferente gruponan a bay entrevista un grandi y atardi a comparti nan experiencia cu esnan cu mester a bay riba diabierna. Tambe nan a duna otro tip. Diabierna a bay finalisa cu e entrevistanan cu tabata falta y a percura pa e parti di documentacion di tur material y informacion colecta.

 

E hobennan a entrevista e siguiente grandinan: Elauterio ‘Techi’ Briesen di 83 aña, Maria Isabel ‘Nene’ Bikker di 98 aña, Benita De Cuba di 80 aña, Dominico Bermudez di 90 aña y Albertina Arends di 86 aña. Sigur nan aporte na e proyecto aki tabata di suma importancia y nos ta hopi contento cu nan a acepta pa participa na Expedicion Rescate Mucha 2016. Sigur DCA kier a haci uzo di e oportunidad aki pa gradici nan pa nan aportacion valioso.

 

Un siman cu a resulta den un exito total. DCA ta gradici MFA Noord cu tambe a forma parti di e proyecto cu a ofrece nos, e localidad gratuitamente y durante siman nos por a conta cu nan sosten tambe. Despues di un evaluacion interno, DCA lo dicidi si e proyecto ERM lo keda agrega riba nan calendario anual.

 

Por ultimo DCA ta gradici mayornan di: Antwone Geerman, Jermaine Ras, Jeremy Ras, Shayna Tromp, Jeandayah Palfit, Aixa Arends, Jake Salas, Julie Farro, Kimberly Geerman, Joshuah Croes, Samuel Vrolijk, Tizienne Arrindell, Mark Theysen, Leandra de Weever y Jeremy Ras pa a motiva y registra nan yiunan pa participa na e proyecto aki.

Via nos fb page Expedicion Rescate Mucha por mira mas di e dushi siman tras di lomba. Tin diferente video y potret di tur e curso/tayernan y e bishitanan cerca nos grandinan.