Pa di cuater aña consecutivo Museo Arkeologico Nacional Aruba (MANA) hunto cu Stichting Monumentenfonds ta organisando un expedicion arkeologico pa tur hende interesa den historia di nos antepasadonan. E expedicion aki lo tuma luga diadomingo 26 di november unda lo tin tur facilidad entre nan transporte gratis pa bishita e sitionan di interes arkeologico, algun di nan no accesibel regularmente pa publico.

Mircla Navas di Stichting Monumentenfonds ta bisa cu e biaha aki e expedicion no a tuma luga riba luna di september pasa cu ta luna di monumento, sino cu e biaha aki nan kier haci algo diferente mas den ambiente di fin di aña. Ta asina cu diadomingo 26 di november entre 10’or di mainta pa 2’or atardi nan ta bay cuminsa e actividad aki na MFA Paradera den un ambiente di fin di aña. Esaki lo encera un bishita na e actividad di Monumentenfonds di Fiesta di Cunucu.

Sra. Navas ta bisa cu e proyecto aki ta uno cu banda di djis duna informacion, e ta un proyecto pa trece conscientisacion y educacion tocante nos sitionan arkeologico como tambe monumentonan di Aruba.

Conscientisacion
Margarita Wever di MANA a bisa cu e actividad aki ta uno pa grandi y chikito unda nan ta duna informacion hopi valioso di e sitionan arkeologico cu nan ta bay bishita. “Hopi importante conscientisa publico di Aruba cu sitionan arkeologico tambe ta monumentonan cu tambe mester di nan proteccion.”

Nan ta e prome monumentonan di nos isla y debi cu nan mester di nan proteccion, MANA conhuntamente cu Stichting Monumentenfonds ta trahando hunto riba tereno di conscientisacion entre otro cu e expedicion arkeologico aki.

E recorido lo tuma luga den e area di Paradera, Tanki Leendert y Santa Cruz. Segun sra. Wever loke ta haci e expedicion aki hopi unico ta cu nan a haya permiso pa bay cu e participantenan na dos sitio arkeologico cu normalmente no ta accesibel pa publico, pasobra nan ta riba un tereno priva. El a gradici e cooperacion di sr. Schoonen y na Stichting Eliezer cu a permiti pa e participante por bishita e sitio arkeologico aki.

Otro sitio arkeologico cu ta inclui den e expedicion aki ta St. Cruz 35, unda investigacion a wordo haci cu un balor historico grandi pa nos isla.

Na cada sitio lo tin expertonan den arkeologia presente cu por duna un bista unico tocante e sitio specifico. E recorido lo cuminsa na MFA Paradera unda e participantenan por haci uzo di e stacionamento y haci uzo di e busnan cu De Palm Tour a pone na nan servicio totalmente gratis. Cada bus tin capacidad pa 40 pasahero. P’esey nan ta pidi pa tur interesa registra prome tumando contacto cu MANA.

Registracion
Tambe esunnan cu ta prefera di haci e recorido cu nan propio transporte libremente nan por pasa busca un mapa na MANA of tambe nan por sigui un di e busnan riba e dia ey. El a laga sa cu e cuponan riba e busnan ta limita. P’esey ta importante pa esunnan interesa di participa tuma contacto cu MANA na tel. 582-8979 pa registra y asina sigura nan cupo(nan). Bo por registra bo famia of grupo di amigonan.