Siman pasa studiantenan di HAVO y VWO a bin cla cu nan examen y expectativa ta grandi pa dia 16 di juni awor ora cu ta wordo divulga e resultado final na Colegio Arubano.
Minister di Enseñansa, sra. Michelle Hooyboer-Winklaar a declara na Bon Dia Aruba, cu e tambe ta na expectativa di e resultado aki, y e ta spera cu e lo ta miho cu esun di aña anterior. Pero e expectativa ta bira mas grandi mirando e turbulencia cu e institucion aki a pasa aden durante e aña escolar aki.
E mandatario a bisa cu e ambiente di expectativa aki ta tur aña y esaki tampoco no ta un excepcion. “Mirando manera bo ta pone e turbulencia cu a pasa den e ultimo aña escolar, mi ta kere nunca nos a mira esaki den tal forma cu a sosode na un scol”, el a declara.
Minister Hooyboer-Winklaar a bisa cu obviamente e kier mira esaki mas pronto posibel pa haya un bista ariba e resultadonan.
“Si esaki en berdad a afecta e cantidad di esnan cu ta bay gradua. Of si nos ta wak cu scol a sigui manera e mester tabata ta, y cu esaki minimal lo sinti esey”, el a bisa.
Nan ta –segun e mandatario- tur e preguntanan cardinal cu nan ta wardando riba dje y nan ta sperando cu pronto nan lo por haya un bista ariba esaki.
