Awe 13 di maart ta e fecha cu formadornan di gobierno, Gerlien Croes y Mike Eman, mester reuni cu Gobernador di Aruba, SE Alfonso Boekhoudt, pa presenta na su persona e acuerdo di gobernacion definitivo. Despues di a pidi un prolongacion, ainda no tin claridad riba un acuerdo di gobernacion, y segun informacion cu ta circula, e proceso aki por tuma mas tempo ainda debi na screening di candidatonan pa minister.
Manera ta conoci 13 di januari ultimo Gobernador di Aruba a apunta Gerlien Croes y Mike Eman como formadornan y a duna nan e encargo pa forma un gabinete stabiel cu tin e confiansa di e fraccionnan di AVP y FUTURO den Parlamento y cu ta consisti di personanan cu ta dispuesto y capaz pa implementa un maneho financiero-economico solido, cu atencion pa costo di bida na Aruba.
Parti di e encargo di formacion ta trahamento di un acuerdo di gobernacion entre AVP y FUTURO y un reparticion di cartera dentro di e gabinete nobo. Finalmente, e eligibilidad di candidatonan pa e funcion di minister y di minister plenipotenciario mester ser evalua previamente a base di e exigencianan y proceduranan stipula den e “Landsverordening integriteitministers”.
Inicialmente Gobernador di Aruba a duna como fecha deadline 18 di februari pa e formadornan informa Gobernador Boekhoudt por escrito tocante nan conclusionnan. E fecha aki a ser prolonga despues cu e formadornan a reuni cu Gobernador Boekhoudt, dia 18 di februari, pa entrega un tussenrapportage mirando cu e proceso ainda no a finalisa y a asina a haya te 13 di maart, awe, pa presenta e acuerdo di gobernacion definitivo.
E formadornan a tene reunion cu mayoria stakeholder den comunidad, cual te cu dialuna ultimo ainda tabata tumando luga. Pa hopi e proceso aki a tuma un tempo demasiado largo, cual varios politico a critica tambe teniendo na cuenta cu tin decisionnan importante cu mester ser tuma cu tin deadline, manera por ehemplo e acuerdo di Rijkswet hibrido cu mester ser entrega prome cu 1 di mei di e aña aki.
Un aspecto cu segun e formadornan a indica ta retrasa e anuncio di e gabinete nobo ta e proceso di screening, cual segun Croes a indica anteriormente lo tuma mas di loke nan a calcula.
E proceso cu ta delinea pa ley, manera cu e ley a ser aproba na 2021, a cuminsa cana despues cu e formadornan a entrega e tussenrapportage na Gobernador Boekhoudt. Segun Croes a indica e momento ey, hunto cu e proceso ey tabatin diferente fase pareu ta cana tambe a, ademas di a continua cu e consultanan cu e stakeholdernan y a menciona cu tambe tabata den preparacion e documento oficial di un acuerdo di gobernacion. El a agrega e momento ey cu banda di esey lo a cuminsa cana e proceso di e posibel candidatonan pa minister y tabata spera cu pa dia 13 di maart, awe,nan lo finalisa e ronda.
Dialuna atardi, despues di a tene reunion cu stakeholders, e formadornan a duna declaracion na prensa presente. Segun e noticiero local Noticia Cla a raporta, Mike Eman a indica ainda falta basta den e proceso screening prome cu esaki por keda cla. Esaki a pone den duda si durante nan reunion cu Gobernador di Aruba e formadornan por presenta ken ta e personanan cu lo forma parti di e siguiente gabinete. Esaki, tambe tin consecuencia ya cu sin cu e proceso di screening finalisa, Gobernador Boekhoudt no por duna un fecha pa huramentacion di e gabinete nobo.
Riba rednan social y den medionan di comunicacion local ta circula informacion cu posiblemente tin candidatonan pa minister cu tabatin problema pa pasa e proceso di screening. Segun e portal di noticia local, Eman a indica cu e no tabata na a altura di algo asina. Na mesun momento el a señala cu tur candidato pa minister si a logra pasa nan screening medico, pero pa loke ta e otro aspectonan, e no por a duna ningun detaye.
E proceso di screening , despues cu a pasa e ley pa esaki na 2021, a bira uno hopi mas rigoroso. Segun informacion e proceso aki no solamente ta screen e candidato su background, pero tambe ta screen su famia cercano, casa of pareha, mama, tata, ruman, y por hasta bay te na famia di e pareha of casa di e candidato.
Manera ya caba menciona e factor tempo ta pone un presion tambe riba e formacion di gobierno. Un di e aspectonan cu mas presion ta pone ta e fecha deadline di 1 di mei pa e Rijkswet cu Hulanda ta un topico cu ta di gran preocupacion. Croes a indica durante su declaracion na prensa despues di su ultimo reunion cu gobernador e topico aki ta uno cu ta regarda e gabinete completo y cu tabata poni hopi halto den agenda.
El a indica e momento ey cu ora ta papia di un Rijkswet esaki no ta descarta full e gabinete awor cu tin cu bay den negociacion, y cu e contacto cu Hulanda tin cu continua.
Croes a bisa cu nan tambe ta sinti e pura y tin algun desaroyo cu e proceso di Rijkswet. El a referi na e rapport cu mester a keda cla di IMF, e rapport cu tur hende tabata sperando, no solamente Aruba pero Hulanda tambe, pero el a dura mas tempo di loke a spera y locual ta aplasa e proceso completo di loke ta tratamento di e Rijkswet.
“Nos ta pendiente tanto di loke ta e rapport aki pero tambe na mesun momento teniendo tur e consultanan cu nos ta teniendo y den plan y ideanan ya caba ta bezig cu algun voorwerk. Internamente los di como formador, tin gruponan di trabou di partido cu na e momentonan aki ya ta haciendo huiswerk cu pa ora e momento yega bo ta full prepara caba pa loke ta e proposicionnan cu bo tin y pa continua bon argumenta y bon documenta cu e negociacionnan cu bo kier hiba cu Hulanda,” el a bisa e momento ey.
Expectativanan ta halto e resultado di e proceso aki y posibel anuncio di un gabinete nobo awe despues cu e formadornan reuni un biaha mas cu Gobernador di Aruba SE Alfonso Boekhoudt. Esaki ta un noticia den desaroyo, keda pendiente pa mas informacion.
