Exito di Filomena College casualidad? Sigur cu no…

Cos bon ta sucede ora hende cu ta dispuesto di traha duro y no ta laga circunstancia adverso stroba nan. Esey ta e impresion di e exito inespera, pero hopi grato, di e resultado di examen di Filomena College Mavo na San Nicolas.

Riba 90%, pasando e scol cu pa hopi aña tabata para na e top di e scolnan na nivel di Mavo, Mon Plaisir. Mientras cu e scol na San Nicolas a logra yega na e nivel tremendo aki, e pregunta ta kico a contribui na e exito aki. Di loke nan mes a conta, nan tin un infrastructura bastante completo: tin un coordinador, consultor, remedial teacher, decano.

Banda di esey tin un structura di contacto frecuente cu mayornan y tin un programa varia di actividad extra curicular cu ta haci hunto cu varios instancia pafo di e scol. Y tur esey aparentemente no a hiba na un exito rapido, pero stamina y mantene animo durante hopi tempo a duna e resultado aki. Nos no sa si tur scol ta conta cu e mesun structura di apoyo aki, y cu a pesar di esey e resultadonan ta varia.

Algo nan ta haciendo bon mes na e scol aki pa yega na e resultado aki, logra ‘contra biento y marea’ sigur si nos tuma na cuenta e comunidad di cual e scol ta parti: e parti mas golpia economico y socialmente durante varios decada riba nos isla.

Prome cu e ciere di e refineria caba, economia di e ciudad a cuminsa bay atras y e centro di actividad a muda bay pa e parti pabao di e isla. E intentonan pa mantene den e ciudad un nivel adecua di servicio no a logra, y cu e deterioro di e parti comercial e habitantenan a haya nan den e situacion cu pa tanto servicio di sector publico como priva, pa un gran parti nan tabata depende di un biahe pa e otro banda di e isla.

E empobrecimento gradual a cuminsa traduci su mes den deterioro di vivienda, empeora pa e salida di gran parti di e generacion mas hoben pa busca un bida na otro parti di e isla o den exterior. Como agravante a bin acerca cu gobiernonan sucesivamente no tabata haya necesario pa mantene e infrastructura di e luga na un nivel aceptabel, loke a influencia hopi e aspecto visual. Traves di añanan a cuminsa bin e ‘stigma’ tambe, cu e parti di e isla aki lo ta inferior y cu esey ta algo cu mester camufla pa bishita di afo.

Durante bishita na 2013 di un delegacion comercial bao guia di prome ministro Mark Rutte a bishita San Nicolas tambe, a pesar di e malestar den seno di e gobierno di e tempo ey, cu tabata haya cu no mester laga nan mira ‘e banda mahos di Aruba.’ Sinembargo, e mandatario Hulandes a expresa mas vision, observando cu ta esaki ta loke Aruba mester traha ariba: trece e parti aki na e nivel igual di prosperidad cu e merece…

Pa varios decada, cada eleccion tabatin un chispa di speransa cu algo lo ta bay cambia pa miho. E reapertura di e refineria na 1991 a trece empleo, pa hende riba henter e isla, y tambe pa esunnan bibando na San Nicolas. Esaki lamentablemente no a conduci na e creacion di un base economico suficiente pa, hunto cu servicio publico na un nivel adecua, por a crea un centro economico di nivel atrobe.

Lamentablemente den e decadanan despues e aspecto empobreci no a cambia y a bira e parti di e isla di cual preferiblemente no ta papia mes, te pa haci. Den tur e añanan ey practicamente no a mira un plan strategico tampoco, di ningun partido politico, cu tabata duna e impresion cu nan ta comprende e profundidad y alcance di e deterioro socio economico den cual e ciudad a cay. Lo a tuma hopi mas cu traha un rotonde aki, drecha un watertoren aya…

Ta papia di un cantidad impresionante di vivienda cu apenas por yama nan habitabel, pa no papia mes di e cantidad cu a cay o mester tumba ainda, pasobra nan ta un peligro publico. Ta p’esey tambe cu e berdadero cambio, e berdadero transformacion cu mester bin pa atende e problemanan grandi cu San Nicolas tin, pa e ciudad bolbe na un nivel aceptabel como luga di biba.

Pa bolbe na unda a cuminsa e editorial aki, nos ta kere cu ta importante pa percura pa e resultado grato aki haya continuacion. Es mas, loke aparentemente nan ta haci bon, merece estudio y aplicacion den henter nos enseñansa. En general e resultadonan escolar na Aruba mester mehora, na tur e scolnan riba e isla, hayando nan tur e medionan pa cada un por  crea nan propio exito.

Loke ta parce nos cu e caso aki ta siña nos, ta cu dispone di e medionan pa traha riba su mes ta condicion, pero no ta garantia di exito. Crea un berdadero ekipo, cu sa apoya otro y compensa e bandanan debil di e otro, mescos den cualkier deporte, ta trece exito. Y ta mustra cu adversidad riba su mes no ta significa fin di mundo. Chapeau.