Exigi estado di derecho… Y no cumpli cune…?

Diaranson pasa tabata un dia scur den nos historia. Pa e sostenedornan di e parlamentario y ex-ministro aresta esey tabata otro oscuridad cu pa otro ciudadanonan cu ta sinti berguenza cu den nan pais cos mester yega asina leu. En todo caso, e detencion di e politico no tabata un sorpresa, pa e mes tampoco. Loke si tabata un sorpresa desagradable, pa esnan cu ta aprecia biba den un pais ordena y cu respet pa autoridad, tabata e reaccion di parti di e simpatizantenan, di prensa comprometi, di e persona en cuestion mes y di e lider di e partido cu mas cu tur cos den ultimo añanan ta produci mandatario di caliber dudoso.

No tabata nada agradable pa mira e explosion di emocion, no solamente cerca e simpatizantenan di e politico, esey nos por mira na mas pais sucede tambe, pero si tabata un sorpresa completo scucha un reportero di un portal liga na e partido menciona y ripiti e nombernan di e miembronan di cuerpo policial cu tin como tarea pa colabora den e investigacion aki. Asina baho nos no a mira periodismo na Aruba bay ainda. Ningun momento un persona asina no por realiza cu loke e tabata haciendo ta expone e personanan aki na odio, menaza y hasta violencia, pa e mero hecho cu nan ta haci nan trabao y cu no ta importa ken nan ta? Den mesun rosea cu ta acusa e partido rival den gobierno di a orquesta henter e investigacion aki, ta cuestiona tambe e empleadonan publico cu simplemente ta haciendo nan trabao? Ki sorto di estado di derecho nos ta desea, si ora ta actua contra un persona cu tin nos simpatia, di inmediato e funcionarionan aki ta bira representante di tur cos cu ta malo?

Di igual caliber pesimo tabata e reaccion di e lider di partido cu a mantene su declaracion cu e ta kere den inocencia di e persona. Esey riba su mes ta su bon derecho, di cualkier ciudadano cu kier pensa asina, esey no ta e punto. Punto ta cu ta bisa di un banda cu mester laga husticia haci su trabao, pero di otro banda ta acusa Ministerio Publico di ta actua bao influencia di e partido grandi den gobierno. Anto esaki ta un ex-ministro presidente y candidato pa ocupa e puesto ey atrobe? Cu ki cara e ta enfrenta representantenan di e entidad ey si e yega na puesto di responsabilidad den gobierno atrobe? Kico e ta bay exigi di nan: cu nan ta obedece e ora su ordennan o cu nan ta haci riba nan mes loke nan ta kere necesario?

Ademas, nos por corda cu durante e anterior caso di detencion di un ministro, e no a declara cu e ta kere fielmente den su inocencia, pero a bisa cu a adverti e mandatario ey caba pa e actonan pa cual husticia tabata persiguie. E ex-ministro presidente tin diferente standard pa diferente caso di delincuencia den su gabinete? Aunke mester bisa cu seguidamente no a laga e ministro ey renuncia, pa berdaderamente e duna ‘husticia espacio pa traha’. Awendia e ex-ministro, cu un promer condena tras di lomba, ta campañando pa e partido, manera nada no a pasa?

Ta ki norma nos kier aplica en general anto den e comunidad chikito aki, cu ‘cera delincuente ta bon, basta no ta mi hendenan’? Cu mester ‘laga husticia haci nan trabao, te dia cu nan mishi cu mi hendenan’? Nos a kere semper cu biba den un estado di derecho ta cu bo por spera como ciudadano un trato husto y igual pa tur. Esey no semper ta keda cumpli; nos conoce demasiado bon e casonan di hende cu ta ‘niet zomaar iemand’ y cu tin ora ta haya un trato di ‘handschoen di felpa’. Pero no ta pornada ta denuncia e casonan ey, pasobra nan ta bay contra e principio di trato igual cu ta base di tur cos den un democracia.

Pa bolbe na e expresion di e ex-ministro presidente cu e ta kere cu e persona ta inocente. E cu a carga e responsabilidad mas halto den gobernacion despues di Gobernador, mester sa cu su opinion ta totalmente irelevante. E mester por sa cu Ministerio Publico no por yega man bashi cerca un huez comisario, anto pidie pa firma pa un serie di entrada hudicial na diferente adres, sin nada concreto? Y cu ta emiti recado di prensa unda ta declara cu e persona ta ser sospecha di lidera un organisacion criminal, sin un ‘shred of evidence’?

Finalmente, e escogencia pa e persona deteni awor bay riba lista di e partido pa proximo eleccion. Con esaki resulta, bon o malo pa e partido, ta nan mes a scoge esaki. Loke a tuma lugar awor no tin nada di haci cu e contrincante politico y nan supuesto influencia riba autoridadnan hudicial. Si mira e secuencia di aresto y interogacion di esnan posiblemente envolvi den e supuesto organisacion criminal, tabata logico cu dado momento lo a toca turno na e politico aki, e mes tabata consciente di esey. Si e ta inocente, esey lo resulta di e interogacionnan. Lo mas grave ta cu tin un politico ta aspira bira promer ministro atrobe, cu ta exigi estado di derecho, pero no ta mustra ningun respet pa e mesun estado ey.