Parlamentario di fraccion di AVP, Melvin Tromp, ta mustra cu den MEP no tin politico di calidad pa goberna nos pais, caminda por bisa cu tur frankesa cu lider di MEP su unico motibo den politica ta pa bolbe enrikece famia: “Nos por mustra riba entre otro Glenbert Croes su historia politico cu ta confirma loke cu e articulo aki ta papia di dje, esta ta carece di nivel y otronan cu ta pretende cosnan cu di berdad no ta aparenta paso e nivel pa goberna un pais ta mucho pa esunnan den MEP Nos por tuma por ehempel un lema cu e lider di MEP, Evelyn Wever Croes ta propaganda su mes, esta ban pa e cambio. Pero fuera di e borchinan ey, ainda partido MEP no a mustra pueblo ningun caminda ni den ningun forma, kico e cambio aki ta consisti di dje.
Evelyn y su partido ta papia di cambio sin cu tin algo concreto cu nan kier cambia, cu nan kier haci y cu nan kier mira wordo cumpli cu ta haci gobernacion di e pais miho cu loke pueblo a conoce den ultimo ocho aña. Pa es motibo aki tin cu mustra cu nunca MEP a bin cu un plan alternativa pa loke ta gobernacion y tur esaki pa motibo cu den e MEP di Evelyn, ta existi un gran falta di experiencia. Loke ta e preocupacion hopi grandi di pueblo ta cu e palabra “cambio” cu e lider y algun di su coleganan di partido ta papia di dje, ta conoce caba den pueblo ora cu MEP drenta gobierno. Ya caba por anticipa cu mescos cu na 2001, un gobierno di MEP lo ‘freeze’ indexering, mescos cu vakantieuitkering y otro beneficionan cu trahadonan publico a perde na 2001 y a bin recupera na 2009.
Ya caba e lider di MEP y tambe otro miembronan di fraccion di MEP ta papia di ‘para proyectonan’ cu ta den ehecucion y e tipo di mentalidad di goberna aki di MEP, ta pone cu reparatietoeslag, schoolkindertoeslag, eenmalig schoolgeld cu a subi e aña aki di 120 pa 220, lo wordo elimina causando otro problema grandi pa nos comunidad y esunnan mas vulnerabel den comunidad. Aumento di pensioen cu gobierno a introduci na comienso di aña di 2,3% tambe ta core peliger mescos cu salario minimo cu a aumenta cu 2% mientras cu reduccion di tarifa di coriente residencial di 15% y pa esun comercial di 5%, tambe lo wordo elimina.
Pueblo mester ta alerta cu contenido di e ‘cambio’ cu MEP ta papia di dje ya cu pa experiencia pueblo ta bon na altura cu MEP y su lider nan unico puntonan como plan, ta critica y sperando cu pueblo su lo bay nan tras di e promesa bashi aki y asina pa famia y amigonan por wordo buta den teblachi di oro MEP a converti nan mes den un partido di hiba trece, pa condena nan propio pais, no obstante cu pueblo ta mira e desaroyo nan cu na final ta pa beneficio di pueblo, y caminda pueblo por ta sigur cu AVP ta traha pa interes di pueblo y no pa interes di famia”, parlamentario Melvin Tromp ta mustra.
