Famia di Corsou ta sinti su mes secuestra na Aruba, y nan yiunan ta na Corsou nan so. Y e secuestrado ta Gobierno di Corsou, cu ta exigi casi 8000 florin pa bolbe cas. Asina Keithley Hooker a bisa Bon Dia Aruba. Hooker hunto cu su casa Joyceline y mas famia a bin Aruba dia 5 di Augustus pa entiero di su ruman muhe.  E entiero a cay riba e mesun dia cu Corsou a dicidi pa cera frontera pa Aruba.

 

“Nos tabata na Aruba algun siman prome, pa asina compaña nos ruman, prome cu el a fayece. Despues cu nos bolbe Corsou, nos a haya notificacion cu el a fayece.” Hooker a bisa cu nan a dicidi mesora pa bolbe pa entiero. Ningun momento por a pensa cu esey a nifica cu tin un casi un siman sin por bolbe cas.

 

Na Aruba sin fondo

E motibo pakico no por bolbe ta e suma cu simplemente no tin. Corsou a dicidi pa cera frontera cu Aruba despues di un explosion di caso di Covid19. Ademas a pone un medida di cuarentena pa tur hende cu ta bin di Aruba, cu ta nifica cu pa e pareha Hooker, lo mester bay den un hotel pa dos siman. E gasto ta core pa nan cuenta, cu ta 3900 florin pa persona cu ta cubri e hotel, cuminda, servicio y e test di Covid19, e PCR, na final di e 14 dianan. E famia Hooker y mas miembronan di e fayecido cu ta biba na Corsou, no tin e fondonan aki. Y no ta compronde di con Gobierno di nan pais no ta tene consideracion cu su ciudadanonan.

“Nos a purba tuma contacto cu tur hende posibel den Gobierno na Corsou pa mira con pa yuda nos, pero nos no ta hayando ningun reaccion.”

 

Autoridadnan no ta contesta

Pa bolbe Corsou, mester yena un formulario na ‘reisverificatie.cur@gobiernu.cw of travelhistory.epi@gobiernu.cw of hasta manda un whatsapp na +5999 -564-0440. E famia a haci tur esaki, pero sin resultado. Ningun hende ta contesta, y esaki ta bay pa cuater a cinco dia caba. Bon Dia Aruba tambe a yama e number varios biaha y mas bien ta haya un voicenote cu ta bisa cu e inbox ta yen.

Tambe a trata di yama voceronan di Gobierno di Corsou, Sr. Maharo Inesia, pero tampoco a logra haya contacto. E otro vocero, Corinne Leysner si e reacciona y a bisa cu e mes no ta na Corsou, y no por haci mucho pa yuda e famia. El a duna Bon Dia Aruba a mesun numbernan cu ya caba e famia tin na su disponibilidad pero cu no ta mustra di ta reacciona.

 

Yiunan

Famia Hooker tin dos yiu na Corsou. E dos muchanan, di edad di 12 y 8, ta kedando cerca nan tanta. Y cada biaha ta puntra nan mayornan ki dia nan ta bolbe. Ademas, e cas di Keithley y Joyceline Hooker ta para su so, y tin animalnan pa cuida, y cu dificilmente por exigi di otro hende pa haci locual mester.

 

Emocional

E ta un situacion emocional masha grandi mes, pasobra awor aki ta depende di sosten di famia y amigo na Aruba pa e famia Hooker por come y drumi, y nan angustia ta cu nan no por yega nan cas pa cuida nan yiunan. Keithley Hooker no ta compronde e exigencia pisa di 3900 florin pa bay den cuarentena, pasobra e tin su cas. E por tene cuarentena na su cas. E no tin e fondonan necesario pa paga pa dos hende bay den e programa di cuarentena di Corsou. Y locual e ta haya hopi inhusto ta cu Corsou no ta impone e mesun exigencia ey pa personanan cu ta yega Corsou for di Hulanda. “Hulanda tin mas caso di contagio cu Covid19, pero asina mes, hendenan cu yega no mester paga e suma aki di 3900 florin pa bay den cuarentena.”

Hooker a splica cu e aerolinea ta pendiente pa Corsou duna aprobacion pa por hiba e hendenan pega aki bek pa e isla ruman. Pero e aprobacion ta crucial, pasobra si e aerolinea mester bay Corsou sin e luz berde di autoridadnan, e lo perde su permisonan pa futuro.

“Nan tin nos secuestra aki,” Keithley Hooker a bisa desespera.

 

Yamada pa ayudo

Awor aki ta haci un yamada via Bon Dia Aruba pa asina mira con Gobierno di Corsou por tene cuenta cu un famia, y dos muchanan cu awor ta nan so, sin nan mayor, mientras cu ta preparando pa cuminza scol atrobe. “Y nos ta pega aki, sin placa, y sin placa pa paga pa bay den e cuarentena na Corsou,” e tata desespera a bisa.