Ayera merdia a tuma luga e apertura oficial di e exhibicion titula “50 aña di luz Perpetuo” cu ta duna honor na 50 aña di existencia di Checkpoint Color y su fundado Sr. Rob Vermeer.

Natusha Croes, productor di e proyecto aki a splica cu e iniciativa a cuminsa dos aña pasa y como un di e modelonan mas jong di Vermeer, un combersacion y colaboracion a cuminsa na unda Vermeer a mustra Croes su potretnan. “Mi a sinti di biaha den mi curason cu un exhibicion ta na su debido tempo”, Croes a expresa.

Asina a cuminsa cu un proceso di digitalisacion di tur e negativonan cu Vermeer tabatin warda. Croes ta conta cu cahanan yena cu negativo a wordo baha for di zolder pa asina por digitalisa, scan, retoca y forma un coleccion grandi di mas di mil potret. Den e exhibicion aworaki por aprecia 200 potret cu a wordo selecta door di yiu homber di Rob Vermeer y director actual di Checkpoint Color, Fernando Vermeer, cu ta encarga cu e instalacion y e exhibicion.

Como productor, Croes a indica, el a zorg pa acerca instancianan manera entre otro UNOCA cu a yuda cu e printmento di potretnan, y Prins Bernhard Cultuurfonds cu a apoya 11 documentario, entrevista, graba cu diferente modelonan cu a traha cu Rob Vermeer desde aña 1972 te dia actual.

“Loke pueblo di Aruba por admira awe ta un coleccion grandi di potretnan cu ta mustra e era moderno di Aruba. Cuminsando na aña 1972 te 2022 bo por wak diferente personahenan importante pa nos historia, manera Betico Croes, Vale Croes, Felis Ras entre otro, icono- y baluartenan di nos isla y bo por wak con Aruba a desaroya e ultimo 50 añanan aki. E ta un momento historico, un momento di aplaudi y un momento di ta hopi agradecido di por ta parti di esaki”, Croes a comenta.

Sr. Rob Vermeer a conta cu el a cuminsa cu su negoshi 50 aña pasa ora el a bin back for di Hulanda, y manera hopi fotografo aworaki, el a cuminsa saca potret di bruid, di famia, di yiuchi etc. Pero el a ripara cu hopi hende tabata kier e potretnan na color y como no tabatin laboratorio di color aki na Aruba, nan mester a manda tur cos pa Corsou of Hulanda y esey tabata dura simannan largo prome cu por a haya e potretnan back.

Asina el a tuma e decision cu mester un laboratorio di color pa potretnan na Aruba, pero e no tabatin e fondonan – ni su famia tampoco – pa cumpra e ekipo necesario. El a sigui conta cu el a cuminsa cana e caminda pa haya e fondonan y danki na contribucion di diferente persona y instancianan, el a alcansa 100mil florin, cu e tempo ey tabata hopi placa y el a cumpra tur e ekipo di color.

“Mi a habri mi luga 3 di augustus 1972 y e prome cliente cu a drenta tabata un di e rumannan Eman cu a pone 10 rol di potret mi dilanti pa laba. Esey tabata un bon señal y for di eynan mi a cuminsa laba potret y tur cos a bay hopi smooth. A bin 24 ora, a bin 1 hour y nos a habri siete diferente tienda rond di Aruba na area di hotel, San Nicolas, Cura Cabay, Oranjestad y nos a cuminsa crece hopi”, Vermeer a bisa.

Pero tempo cu e era digital, telefon a haci su entrada e negoshi a bira hopi menos y lastimamente nan mester a cera e tiendanan un pa un. “Esaki a duel mi echt hopi, no pa e tiendanan pero pa e personal, pasobra den tur e añanan cu nos a traha y nos a crece te yega 40 aña, nan tabata famia y hopi di e personal tabata den nos servicio 10, 20 aña y esey a haci hopi dolor. Pero pa nos por a sobrevivi, e tabata un necesidad”, el a remarca.

Tur e tiendanan a cera y Checkpoint Color a drenta Columbusstraat y nan cuminsa cu menos empleado te cu Fernando a tuma e negoshi di famia aden su mannan.

“Fernando a haci Checkpoint na su idea y ainda e base ta fotografia, pero den e edificio dilanti el a haci un estilo di museo y Checkpoint ta wordo usa ainda pa graba, pa saca potret. Hopi danki na Fernando cu su creatividad por a laga nos biba mas den futuro”, Vermeer a agrega.

E apertura a conta cu presencia di varios Minister, entre nan Minister di Finanzas y Cultura, Xiomara Maduro, ken a tuma e oportunidad pa felicita Checkpoint Color cu 50 aña di existencia y Sr. Vermeer pa su cumpleaño. Y alabes a haci entrega di un recuerdo di su parti na Sr. Vermeer pa e trabou realisa durante 50 aña.

“Mas cu claro nos no kier laga un momento asina special bay sin cu nos ta trece un tiki di nos curason, pasobra locual cu Rob ta haci pa cincuenta aña, ta capta y colecta recuerdo, memoria di nos pais. Awe mi tabata kier duna un regalo chikito cu nos ta entrega cu hopi amor y hopi gradicimento pa e 50 añanan di tur esfuerso, pero mas cu tur cos masha danki pa capta y conserva e memoria di nos pais a traves di fotografia pa 50 aña”, Minister Maduro a expresa.