Algun siman atras, nos a publica un storia di un mucha di dos aña cu mester a warda cuater luna pa haya atencion di un specialista. Akinan ta trata di baby Sheldon cu a keda wordo manda cas cu Paracetamol, pa despues e mayornan haya e noticia cu nan yiu tin un cancer na su higra. Nos a combersa cu dr. John Croes riba e maneho di prescribi medicina na un pashent specialmente ora e ta un mucha.
Desde inicio nos ta haciendo fout ora ta trata e uzo di por ehempel Paracetamol pa muchanan chikito segun dr. Croes. “Nos ta pensa cu un baby ta un adulto miniatura. Anto ki ta pasa, su metabolismo y funcionamento di su organonan ta totalmente diferente.” E ta bisa nos cu experimentonan haci den laboratorio pa e uzo di Paracetamol por ehempel, ta basa riba totalmente un otro sistema: nan no a haci experimento den e babynan. Nan ta experimenta esakinan den e bestianan pa despues bay pa pone na e adultonan sin tene cuenta cu e sistema di un baby ta un otro asunto.
Exceso di remedi
E dokter ta enfatisa cu di chikito caba, e mucha por ta recien naci anto e haya Paracetamol, for di eynan caba ta haciendo dañonan na nan higra y riñon.
“Tur pashent cu ta hayando problema durante nan bida cu higra, riñon y tur e cosnan ey, nos mester pensa no ta alcohol of cosnan pika. Ta cosnan cu nos a duna muchanan di chikito.”
Dr. Croes ta señala cu e entrevista aki ta bay tin balor ainda aki 10/15 aña: “Nos ta fout bezig y nos mester tin durf di papia.” E dokter ta enfatisa cu e hendenan na Aruba no ta contento cu e sistema medico actual, pero nos comunidad no ta papia. “Nos Rubianonan ta mucho trankilo y p’esey nos no ta sinta discuti cu e dokter pasobra normalmente e Rubiano tin hopi respet pa e dokter. Si ta otro caminda nan ta kibra henter e consultorio pa bo pasobra e sistema no por ta asina. Dokternan no ta duna bo chens mas pa bo papia, ta un keho so bo mag di tin.” Mas e dokter warda cu e kehonan segun dr. Croes, ta mas ocasion bo ta duna pa e malesa avansa den e curpa.
Esey e ta subraya ta e problema cu nos ta wak na Aruba unda dokternan ta bisa bo cu bo no tin nada y djis duna bo Paracetamol pa tur cos. E problema cu prescribi Paracetamol pa tur cos specialmente den curpanan mas jong, ta daña e higra y riñon den un manera cu bo no por midi e. Anto despues di tempo ta ripara cu e muchanan ta haya malesanan straño of tumornan/cancer trempan pa via di exceso di remedi. “AZV no kier pa nos manda e pashentnan haci test constantemente. Anto esey ta haci cu e gastonan ta bay keda subi. Pasobra e sistema no por keda curativo, e mester bira preventivo.”
Integracion di homeopatia
P’esey segun dr. Croes, e ta opina cu e dokternan mester siña uza homeopatia den e prome añanan di e mucha su bida. “Anto nos mester ta un poco mas habri pa esey. Pasobra una bes cu nos ta haciendo esey, nos ta practicando un miho medicina. Pero pa cambia esaki, nos mester cambia nos manera di pensa.”
E ta bisa cu aworaki practicamente bayendo cu pensioen, e ta pensa cu ta masha hopi por wordo haci pa e pashentnan. “Mi a yega di puntra dokternan cu tin 50 aña trahando como dokter di cas: cuanto pashent bo a cura? Nan ta keda keto y bisa mi cu niun nan a cura den nan bida, wel ami si a cura miles di pashent. Pasobra ami ta practica un medicina basa riba futuro. ” E futuro ta bisa bo cu medicina mester ta integrativo segun dr. Croes. Pues pa combina medicina y tin menos side effect.
Straf pa pashent iresponsabel
P’esey e dokter ta enfatisa cu dokternan mester haci un curso di homeopatia unda nan lo wak cu esaki por wordo integra den e remedinan convencional cu segun e ‘tremendo’ resultado.
Medicina preventivo ta e medicina di futuro segun dr. Croes, unda cu por ehempel na cas bo ta percura pa semper tin medicina homeopatico pa ora muchanan tin keintura, wak pa bo dieta y mas. “E pashent di futuro tambe mester bay carga mas responsabilidad. Esaki ta un punto cardinal. Bo no por core auto duro henter dia anto pensa si bo kibra bo pia, AZV ta bay pag’e pa bo.” E dokter ta pensa cu mester tin un straf algun caminda pasobra esaki ta conscientisa e pashent pa no haci cierto cosnan mas.
Medicina preciso
Dr. Croes ta bisa cu por ehempel dunando muchanan remedi manera Paracetamol ta causa cu desde chikito caba ta forsa su riñon y higra, pero den laboratorio bo no ta wak e. Dr. Croes ta duna un ehempel: “Si bo bay laboratorio y resultado di cholesterol, sucu of algo otro ta entre 1 cu 10, nan ta bisa si e cay na 2 e ta normal of na 9 tambe ta normal. Pero no ta asina, un resultado di 9 kiermeen e ta halto y 2 kiermeen e ta abao. Anto p’esey nos ta keda haci fout den medicina. Medicina di futuro mester ta preciso y no mas o menos. ” Otro punto cu el a trece pa dilanti ta cu Merca y Hulanda por ehempel mester bin Aruba pa siña di nos. E ta conclui: “Chromosoomnan ta adapta nan mes diferente ora cu bo ta duna un remedi na un persona di Europa cu un persona di Caribe. E efectonan ta diferente. No ta paso e remedi ta fit na Hulanda kiermeen e ta fit na Aruba. Nos chromosoom ta diferente anto door di esey bo ta haya bo cu reaccionnan masha straño mes. Ta door di esey remedinan ta dal nos otro cu hopi biaha mas ‘side effects’ compara cu hendenan di Europa.”
