(AP)—E capital Sarajevo di Bosnia a ser tapa cu un neblina toxico desde e comienso di luna, cu calidad di aire asina malo cu e ciudad a sali na prome luga den un lista di e ciudadnan mas contamina na mundo pa dos dia tras di otro.
E compania Suisa tecnologico pa calidad di aire IQAir, cual ta compila un lista, a pone e index di calidad di aire di Sarajevo, of AQI, na 302, cual ta den un categoria “hopi insaludabel”, sigui pa 239 den e ciudad Indo Kolkata. “Mi kier a yora awe mainta pasobra mi mester a sali pafo y inhala veneno pa por yega trabao, segun un residente. “Mi sa cu cambio ta tuma tempo, pero nos autoridadnan ta demasiado slow y polucion ta matando nos.”
Nivelnan halto di polucion di aire den lunanan di winter historicamente tabata un problema intractabel pa Sarajevo, cual ta scondi den valle den e montañanan. Sinembargo, e situacion a sigui deteriora, cu emision- y polucionnan subiendo cu 3% pa aña pa e ultimo decada debi na e profileracion di edificionan halto cu ta blokia airflow, e uzo di vehiculonan bieu y e aumento di uzo di carbon pa calentamento den e ciudad. Autoridadnan local recien a reconoce polucion di aire como un problema acuut y a cuminsa tumando medida pa resolve esaki, incluyendo por medio di mehora transporte publica gradualmente y aumento e cantidad di edificionan cu ta spaar coriente.
Sarajevo a ser inclui entre e 100 ciudadnan cu e Union Europeo ta yudando yega emisionnan di net-zero pa fin di e decada y ta actualmente desaroyando plannan di accion y inversion pa neutralidad climatico den tur sector, incluyendo energia y transportacion, via un proceso envolviendo e sector priva, ciudadanonan y organisacionnan di investigacion.
Nivelnan halto di polucion ta plaga otro ciudadnan na Bosnia debi na e dependencia di e pais riba carbon y palo pa calentamento y carbon pa generacion di electricidad. Segun World Bank, aproximadamente 3,300 hende na Bosnia ta muri prematuramente tur aña pa via di e exposicion di polucion di aire, cual ta conta pa 9% di e mortalidad anual. Aproximadamente 16% di e strobamento di salud aki ta ser causa pa Sarajevo y e ciudad di Banja Luka.
