Despues di varios luna sin trabao y sin entrada, finalmente un grupo di 60 trahado cu tabata na servicio di Excelsior Casino N.V. ta haya luz na final di e tunnel, y nan lo cuminsa cobra nan cesantia. Esta despues cu e casino menciona oficialmente a wordo declara den bancarota.
Desde cu e casino a cera nan porta na inicio di aña, e trahadonan a bay bati porta di Banco di Seguro Social (SVb) pa busca nan derecho for di fondo di cesantia. Pero SVb a abstene di haci e pago aki, te ora cu e casino ta wordo declara oficialmente bancarota.
Pero awor cu e casino a wordo declara oficialmente bancarota, e trahadonan lo por reclama nan derecho di cesantia cerca SVb pa loke ta nan añanan di servicio. Entrante awe y te dialuna entre 2or pa 4or di atardi nan por pasa SVb pa yena e formulario corespondiente, pa SVb lo por procesa nan pago di cesantia. Nan mester presenta cu nan dos ultimo payslip (februari y maart) na oficina di Mediador di Gobierno.
Na momento cu e trahadonan a wordo informa cu nan lo keda sin salario y operador di e casino pa medio di nan abogado a laga sa cu nan mes lo pidi bancarota di e compania aki, un caminda di cruz a cuminsa cerca e trahadonan. E tempo aya e trahadonan a haci un apelacion na SVb pa paga nan añanan di servicio. Pero esey no a sucede.
E caso a tarda den sentido cu e compania mes a pidi bancarota. Esaki ta demanda un proceso huridico mas largo. E trahadonan a bay bati na porta di oficina di Mediador di Gobierno. Nan a conseha e trahadonan pa no sigui warda, ya cu SVb ta na spera pa haya un sentencia di hues pa ehecuta pago di nan añanan di servicio. Den e grupo grandi aki tin trahadonan entre 15 pa 22 aña di servicio. Finalmente corte a trata e peticion di e trahadonan pa declara e compania cu tabata opera e casino oficialmente den kiebra pa medio di e vonnis di 2 di september ultimo.
Aunke pa varios luna e trahadonan a keda na servicio legalmente di e compania, pero nan no tabatin salario. Tampoco e compania no a pidi pa subsidio di salario. E pregunta cu ainda ta keda colga cerca e trahadonan ta: kico ta pasa cu e lunanan cu e trahadonan a keda sin haya salario. E ta keda un suma di placa cu e compania ta keda debe nan? Pero awor cu ta conoci un sentencia di hues, un curator ta keda nombra kende lo ta encarga di inventarisa tur e debenan cu e compania a laga atras.
E casino aki manera otro casinonan a yega di cera nan porta ora cu nos pais a cuminsa confronta e crisis di coronavirus na fin di maart ultimo. E diferencia ta cu e operador of doño di trabao di e casino aki a yega di informa nan trahadonan cu nan no lo continua na april, ya cu e contracto cu nan tabatin cu e doño di e casino cu ta esun cu tin e licencia, a termina. E casino aki a bin confronta problema desde aña anterior.
