Ex vice-ministro Colombiano di Transporte Gabriel García Morales a admiti dilanti di autoridadnan di ricibi placa di soborno, di banda di empresa Brasileño Odebrecht y awor a ser traslada pa prizon. Diadomingo Garcia a acepta tur delito cu Fiscalia General di Colombia a prepara, y asina Garcia ta e prome ciudadano Colombiano, cu ta deteni pa vinculo cu e caso di soborno di Odebrecht. “Ex vice-ministro García a acepta delito di ‘cohecho’ miho conoci como aceptacion di placa y soborno, participacion den contrato ilegal y enrikecimento ilicito. Fiscalia di Colombia a skirbi riba Twitter “husticia a cuminsa briya.” Segun informacion di diario El Tiempo, e vice-ministro a ser traslada pa prizon conoci como “La Picota”, na Bogota.
Ta acusa Garcia di haya soborno di 6.5 miyon di dollar, pa tal motibo Fiscalia a acusa su persona den un proceso cu ta desaroyando den un tribunal na Bogota. Fiscalia General di Colombia a trece prueba relaciona cu pago di placa di Odebrecht pa ex vice-ministro García, pa asina e empresa aki haya un contrato millonario relaciona cu e ‘Ruta del Sol’ na 2009, un importante red nacional di caretera di Colombia. Firma constructor di Brasil Odebrecht a paga 788 miyon dollar pa soborno na mas di 100 proyecto na 12 pais di Latino America y Africa: Angola, Argentina, Brasil, Colombia, Republica Dominicana, Ecuador, Guatemala, Mexico, Mozambique, Panama, Peru y Venezuela, segun informacion for di un documento di Tribunal di Distrito Occidental di Nueva York cu departamento di husticia di Merca a publica december cu a pasa.
