Ex Prome Minister y Lider di e partido mas grandi na Aruba AVP, mr Mike Eman den su reeleccion riba e situacion alarmante cu mundo y Aruba ta den pa motibo di e corona virus, a expresa tambe su perspectiva y preocupacion pa e impacto economico cu esaki ta bay tin riba comunidad y Aruba. 

Decisionnan tuma door di aerolinea y cruceronan y mirando e cifranan economico di pais Aruba, esaki sin duda ta bay ta devastador pa nos hendenan y nos isla.  “Mi a mira ayera e prome y di dos kwartaal di aña pasa y esaki ta mustra cu na maart 2019 nos tabatin 180 mil turista na luna di maart, na april 150 mil y na mei  cifranan similar. Den tres luna nos ta yega na alrededor di 480 mil turista y e aña aki nos ta coriendo riesgo di lo no tin e turistanan aki na Aruba. E cifranan aki ta representa un biyon florin di economia di pais Aruba. 

E un biyon florin aki ta entre otro e salarionan di tata y mama di famia cu ta traha den hotelnan y den otro partinan di e sector turistico,tiendanan, taxista,  waiternan den restaurantnan y tur otro compania cu directamente of indirectamente ta acopla na turismo.

“Aruba ta para un bes mas na un crusada nacional. Un momento di reto sumamente grandi. E ta bay exigi e miho talentonan, e miho capacidad y boluntad di nos hendenan pa nos por supera tanto e reto di salud como e reto economico cu ta bay pisa den hogar di tur nos hendenan”.

“Nos ta teme pa e trabou di nos hendenan, nos ta teme pa nan entrada, nan salud y nan porvenir. Awe, riba nos Dia Nacional nos tin cu hinca rudia cu cara na shelo pa cu nos fe pidi nos Creador pa un bes mas duna e isla chikito aki e conocemento y fervor pa supera e reto grandi aki den podise su momento di mas crucial.”

Eman a splica cu si e momento di e lucha pa nos Status Aparte a trece nos hunto pa un causa comun y si e momento pa supera e retonan di ciere di e refineria na 85/86 a trece dilanti e miho talentonan, e miho capacidad intelectual y visionario di nos hendenan, si na momento di e crisis di 2007/2008 hunto cu un bes mas ciere di e refineria na 2009, hendenan capaz a delinea un caminda di salida pa Aruba. Gobierno a inverti cu hopi proyecto pa pone nos economia bek riba pia y crea cuponan di trabao y na e mes momento a inverti den recupera e poder di compra  di nos hendenan. E mesun capacidad aki lo mester tin pa nos supera e crisis aki tambe. Cu un plan integral cu respaldo nacional, nos por rescata Aruba for di e situacion aki tambe.

“E reto aki ta rekeri e miho di e curason di nos tur. Kitando un banda tur e diferencianan politico y poniendo Aruba central den nos curason, poniendo e bienestar di cada ciudadano central y poniendo hunto tur nos conocemento y capacidad pa supera un di e retonan mas grandi cu Aruba a yega di conoce y un di e inkietudad nan pa loke ta salud di nos hendenan cu mas temor a crea den nos sociedad.

Eman a finalisa bisando cu para na e monumento unda nomber di e tatanan di nos pais ta graba, nos ta comparti cu Aruba henter e amor cu nos tin pa e patria aki y a yama danki na tur cu a sirbi Aruba den pasado. “Ban tuma nota di tur e consehonan cu nos ta haya pa proteha salud di nos hendenan. E distancia social ta algo fisico, pero e cercania di otro den nos curason mester pone nos hunto supera e crisis aki.  Eman ta gradici tur esnan na “frontline” den e cuido di nos salud y ta haci un yamada nacional pa e retonan social economico nos dilanti tambe.