Lesando awe un comunicado di un tal Hessels cu titulo “Un cuestion di principio?” y cual comunicado ta colma cu calumnia y redashi atacando cu lodo tur Arubiano cu ainda tin e curashi pa opone cu argumento e 2 Rijkswetnan cu su gobierno colonial “CHE” cu ta bira e doño di nos pais kier impone y no kier discuti!

Varios profesor y expertonan renombra, Aruba, Corsou y Sint Maarten y nan respectivo parlamentonan a rechasa esaki, bisando cu ora di un prestamo durante un pandemia bo no por abusa door di kita nos autonomia completamente. Ningun di nan ta contra di control, pero no kita nos libertad politico! E CHE ta contra Statuut, nos constitucion y un acto inmoral. Si abo semper tin odio y rabia contra nos Arubianonan, nos aeropuerto no ta cera. Mescos cu bo tabata contra Status Aparte y cu bo a bay biba aya, bo por cuminza cana! Lo bo no haci falta alguno cu storianan yena cu redashi y calumnia.

Un elemento mentiroso y frustra

Mirando cu ami ta su ‘target’, pasobra mi ta contra, el a cuminsa lastra mi cu mentiranan. Mi a consulta un abogado y mirando cu mi tabata politico, el a recomenda mi pa corigi locual no ta berdad di e elemento frustra aki. Hecho ta cu mi no ta ser paga  pa gobierno como consehero y no ta consehero tampoco!

Tocante mi pensioen, despues di a sirbi e pueblo aki pa 36 aña largo mi tin solamente 2 pensioen politico di cual esun di parlamentario ta 3/4 ya cu mi no tabatin 12 aña completo y e otro ta di e 4 periodonan como ministro. Ningun otro pensioen politico mas, ni di ambtenaar ni di miembro di Eilandsraad ni diputado mi tin! Mi pensioen di behes no tin nada di haber cu politica ya cu mi a paga pele masha hopi aña mes! Cu mi tabata of no ta politico mas no tin nada di haber. Pues ningun pensioen mas manera e figura siniestro si tin, esta di ambtenaar y di behes cu ta 2. Abo tambe tin acumula.

 

Hibado di redashi pa Hulanda

E promer articulo cu e elemento desorienta aki a skirbi, lo mi kehele sigur! Por lo demas ami no por kere cu e gobierno aki y parlamento cu e ta lastra tur dia pa diabel etc. ta subsidia e homber aki su fundacion pa calumnia, lastra y haci redashi contra tur politico pa hiba Hulanda. E no tin ningun respet pa boso, ta lastra e ta lastra boso tur dia hibando redashi Hulanda. Su meta ta cu tur politico ta corupto y Hulanda mester tuma over, unda e ta haci mofa, cherche di “autonomia cu bo no por come”, lubidando di bisa cu sin e autonomia aki desde 1986 nunca lo nos ta awe asina leu cu nos economia. Mi persona desde 1973 a pasa den henter e proceso pa locual nos ta awe y den un otro articulo lo publica den cuanto caso cu argumento nos a para gobierno Hulandes y pone nan respeta nos. Nos track record t’ey pa bo tambe por lesa!

 

Un elemento fracasa den bida

Ami lo no perde ni dedica tempo na hendenan frustra cu no por a logra nada den politica y pa envidia y odio, cu nunca despues di a subi lista a haya sosten politico y awo kier lastra otronan den su frustracion y decepcion, cu a keda un “Don nadie” den bida sin ningun legacy honesto. Si den bida bo tabata un fracaso no envidia otro cu a traha dia y anochi pa e pais aki. Bay busca otro lomba politico di esnan rond di bo pa subi. Bay den bo grupo di renegadonan politico cu a purba tur caminda caba y faya y tin mal man hasta pa hero den escogencia di un profesion di ”12 ambachten en 13  ongelukken”. Ami no por yuda cu bo ta ser nenga tur caminda cu bo tantisimo redashi y calumnianan. By the way, pakico abo no a keda Aruba ora Status Aparte a bin na vigor y  bo a bay “biba “na Hulanda. Si aki ta asina malo pakico bo a bolbe y dicon bo no a keda den bo pais di tanto stimacion? Di kico bo a biba aya?