Ex Prome Minister Nelson Oduber: ‘Historia breve di e lucha pa nos Himno y Bandera, nos simbolonan di Union y Libertad’  (parti 2)

Na 1976 Bestuurscollege di Aruba a acerca sr. Anibal Abreu di e orkesta grandi di Venevision na Venezuela y nan sin cobra a acompaña sr. Rufo Odor (dfm) y su koor y Vivons en Chantant cu a canta e himno oficial di Aruba y esaki a ser poni riba disco 45 y e original mescos cu e bandera a ser regala na nos Archivo Nacional.

Den e decadanan 80 e partidonan AVP y PPA nan hendenan no kier a reconoce nos himno ni nos bandera. Hasta ora cu nos como Bestuurscollege dia 18 di maart tabata duna e ambtenaarnan liber pa celebra 18 di maart cu e tempo ey tabata ser celebra como e dia cu nos a inaugura nos himno y bandera, mayoria den comercio no tabata duna nan empleadonan liber pa por celebra 18 di maart.

Boycott di nos bandera

Nos bandera a ser boicotia na hopi scol y hasta e tempo ey durante un encuentro di baseball den Lago Sport Park e bandera a ser kima. Un miembro di ABBA a baha e bandera y trapele. E ora ey nos Bestuurscollege cu ayudo di Eilandsraad a traha reglanan pa por uza nos himno y bandera.

Ta conoci e tempo ey cu Statuutdag, 15 december tabata ser celebra como dia oficial liber y nos gobierno a cambia 15 december pa 18 di maart y desde e tempo ey pa ley 18 di maart a bira nos dia, unda no solamente nos ta conmemora nos inauguracion di nos himno y bandera, pero a bira pa nos di Aruba nos Dia Nacional, mescos cu Merca tin 4 di juli, Francia 14 di juli, Venezuela y Colombia tambe tin di nan den luna di juli. Cu añanan pasando nos himno y bandera a ser acepta pa un y tur.

Pakico a scoge e fecha di 18 di maart?

18 di maart, nos Dia Nacional ta ser celebra cada aña mas grandi y danki Dios e discusion di politica partidario a bay grandemente cu excepcion di e fecha di 18 di maart. Pakico a scoge e fecha ey? E fecha aki a ser scogi pa Betico Croes a base di varios suceso. Ta un lastima si cu e historia di 18 di maart tin recuerdonan bunita, pero tambe den decadanan 40 y 50 di fracasonan den nos historia unda 2147 a firma pa ‘Separacion’ cu a culmina den aceptacion di e Interim Regeling di 12-8, unda desde e tempo ey pa casi 50 aña nunca mas AVP a gana un eleccion.

Den MEP mes tabatin hendenan manera Roland Lacle (dfm) cu a desconseha Betico pa mantene e fecha ey. E realidad ta si cu den nos historia politico mayoria cosnan grandi a tuma luga tanto prome y despues di Status Aparte – den luna di maart. Mi ta corda con nos Bestuurscollege a saca un buki e tempo ey pa splica nos himno y bandera cu a ser hopi uza na scolnan. Mi ta gradici Dios y partido MEP cu como diputado hoben mi por a duna un contribucion na realisacion di nos himno y bandera. E berdad politico ta si cu e iniciativa a bin di nos estadista grandi Betico Croes cu a haci hopi sacrificio personal pa esaki por a bira realidad. Himno y Bandera tabata su vision.

Awe tur isla tin nan bandera

Mi ta corda manera dia di awe ora nos a inaugura nos himno y bandera un politico grandi di Antias a bisa cu un team di bala na Corsou di Banda Bao tambe tin un bandera y esaki el a bisa den forma di cherche. Awe Corsou, Sint Maarten, Bonaire, Sint Eustatius y Saba tur tin nan propio himno y bandera. Danki sigur na e vision di Betico Croes.

E relato aki ta un contribucion di esun cu como diputado a defende den Eilandsraad di Aruba dia 16 di maart 1976 nos himno y bandera. Danki na MEP y tur cu a coopera. Esaki ta historia berdadero sin fantasia. No bruha, 18 di maart ta nos Dia Nacional, unda nos ta conmemora tambe cu 18 di maart 1976 nos a inaugura nos himno y bandera. E Dia Nacional ta uno cu nos a bin cune pa caba cu e discusion di cu si e ta un dia oficial liber regla pa ley. Esaki ta mi contribucion pa por tin informacion di e historia con a yega na un himno, un bandera y nos Dia Nacional.