Laga mi cu mi experiencia largo den politica duna esnan interesa e historia con AVP semper a abusa di momentonan cu nos mester ta uni na bienestar di nos pais.

Pa prome, na 1976 ora di introduccion di nos himno y bandera partido AVP a vota contra, mescos ta e caso ora di introduccion na 1985 di nos propio Banco Central y moneda Arubano.

AVP a rechasa gobierno nacional na 1985.
Ora cu refineria Lago na october 1984 a anuncia na un forma sorprendente cu nan lo cera e refineria dia 31 di maart 1985, Gobierno di MEP bao guia di nos lider Betico Croes a bin cu un Impuesto di solidaridad di 8.2% pa yuda finansa di Aruba. Alabes a baha salario di tur empleado publico cu un sliding scale di 7.75% – 8.5% y p’asina nos drenta Status Aparte. E tempo ey AVP a instiga y dirigi e gremionan pa protesta, subi caya, welga y cual a conduci cu den e eleccion cu MEP su gobierno a organisa adelanta dia 22 di november 1985 a perde di e 13 asientonan cu nos tabatin den e eleccion di 1983, nos a perde nada menos 5 asiento, pero toch a keda e partido di mas grandi na Aruba. Relaciona cu esaki Betico Croes a reuni cu tur gremio, partidonan politico pa ban uni pa drenta 1 di januari 1986 nos Status Aparte cu el a realisa pa su pueblo y cu cos lo drecha ora nos mes lo tin tur instrumento economico den nos man pa desaroya nos pais. Hasta Betico a ofrece pa forma un gobierno nacional y AVP a rechasa esaki!

Henny Eman a gaña pueblo den eleccion 1985 cu e lo kita e 8.2% y lo percura pa baha prijs di gasolin. Hecho ta cu despues cu el a drenta den coalicion cu 3 otro partido politico su gobierno a cobra e impuesto aki 2 aña largo y ainda den e di 3 aña a bin cu un otro 4.1% di impuesto. Esaki ta e prome prueba cu AVP ta un partido cu ta abusa y probecha di e circunstancianan delicado y no ta di confia.

AVP a rechasa gobierno nacional na 1994.
Ora cu mi a gana eleccion dia 6 di januari 1989 y nos a forma un coalicion – mirando e dificultadnan cu inversionistanan tabatin cu e fecha di independencia 1996 y cu nan kier claridad riba esaki – mi a negocia cu Hulanda y a firma dia 13 di juli 1990 pa scrap e fecha di 1996 for di den Statuut, pero manteniendo si e derecho pa bira independiente, mediante un referendum y sosten di 2/3 parti den Parlamento.

Ora mester a cambia e Statuut na 1993/1994, Tweede Kamer di Hulanda a pone yen di condicion pa Gobierno Hulandes y Ruud Lubbers cu Ernst Hirsch Ballin a pidi mi si ami cu lider di oposicion Henny Eman por reuni na Hulanda con pa sali afo. Mi interes pa scrap e fecha di Independencia tabata grandi y mi a coopera.

Na october 1993 nos a firma un protocol pa nos garantisa Hulanda cu nos lo cumpli y pa nan convence Tweede Kamer pa cambia e Statuut. Nos a palabra cu MEP y AVP – mirando e magnitud di e problema financiero debi na e garantianan hotelero – lo bay intenta pa traha den un coalicion cu un base mas amplio. Nos a kibra e coalicion cu ADN y PPA y ora nos a cuminsa negocia pa forma un coalicion, AVP a dicidi cu nan kier eleccion nobo y no un cooperacion. A bin eleccion nobo y AVP a forma un coalicion na 1994 cu OLA y MEP a bay den oposicion. Desde e dia ey, tanten cu un Eman ta guia AVP, ami nunca lo duna sosten na cualkier palabracion haci cu nan, pasobra nan no ta di confia den asuntonan nacional y pa cual mester pone interes di partido un banda.

Reapertura di refineria.
Tempo cu mi a firma dia 19 di october 1989 pa reapertura di e refineria y di cual Gabinete Eman a firma dia 29 di januari 1988 pa desmantela e refineria completamente tambe nan a bandona sala pa no vota y a keda critica e decision pa habri e refineria.

Introduccion di BBO.
Durante Gabinete Oduber IV – den cuadro di reforma fiscal y e vision pa gradualmente reduci e impuestonan directo pa indirecto – nos gobierno a introduci apenas 3% di e impuesto indirecto BBO y a compensa pueblo cu 70 miyon florin. Hecho ta cu BBO no tabata riba carni, galiña, pisca, fruta, berdura, articulonan medico y ni deporte. Mike Eman a orkestra cu su aliadonan den gremionan welga, protesta y asina den e eleccion di 2009 a kita for di MEP 3 asiento y por a manipula pa drenta gobierno, gañando pueblo cu lo kita mesora e 3% di BBO. Sinembargo el a keda cobra esaki y a bah’e na solamente 1.5% pa yuda comercio keda cu 1.5% pasobra ningun a baha nan prijsnan den nan negoshinan.

Calamidad mundial.
Kico nos a mira atrobe? Tin un calamidad mundial di un pandemia y e unico forma cu AVP por sobrevivi ta gaña, manipula, instiga pueblo y opone tur cos. E consecuencianan di e pandemia lo ta dramatico pa Aruba su entradanan, empleo y lo crea un crisis social. Riba esaki Gabinete Wever Croes ta bay parlamento cu tur informacion y splica con dramatico e asunto aki ta y cu mester bay fia placa. Mike Eman atrobe ta instrui su marionetanan pa opone tur cos y no vota. Como cobarde nan ta bandona sala atrobe pa hunga “yo no fui”.

Terminacion contracto cu Citgo.
Un otro ehempel ta con e siman cu a pasa mester a vota pa termina e contracto cu e compania spirito Citgo cu no tin placa ni propiedad aki, cu tin 1 aña sin paga ni huur, cu no a habri e refineria ni un dia y cu nan gang a bay cu tur e placa. Mayoria di esnan di Citgo cu a negocia e contracto ta cera na Merca. Enbes AVP cu a firma e contracto para banda di pueblo, nan a bay para banda di Citgo, atrobe traicionanado nos pueblo y como cobarde nan a vota atrobe Contra.

Esnan den MEP cu kere cu un dia AVP lo coopera cu cosnan bon pa Aruba lo por sigui hunga “mooi weer”. AVP debe su existencia na instiga den momentonan cu mester uni nos pueblo. Pa esnan cu ainda ta kere cu aki lo por tin union entre e 2 partidonan grandi, tur e ehempelnan cu mi treci dilanti ta muestra cu AVP semper tin como meta pa gana eleccion a base di instigacion, trata di pasa riba cadaver politico di MEP y p’asina nan por drenta gobernacion. Nunca nan a cumpli cu locual nan a priminti bo pa bo vota pa nan. Biba cu e realidad aki pasobra bo stimacion pa bo isla bo ta demostr’e cu cooperacion, hecho y no cu papia bunita sin coopera.

E 2 ultimo sucesonan den Parlamento tabata pa mi e ultimo 2 test casenan cu si aki ainda AVP por a pone su interes partidario un banda y bin yuda con pa sali afo. AVP cu esaki ta bolbe habri porta hancho pa Hulanda cuminsa mete, pone, kita y dicta, sino fono. Tur esaki nan kier tambe pa bo forma bo opinion.