ORANJESTAD – E prome reaccion di e politico y lider di partido AVP, Mike Eman, tocante e caso Ibis, tabata a base personal, pero tambe e tabata uno di reflexion profundo pa tur partido y pa politiconan, pa mira con nan ta bay atende den futuro pa proteha nan mes miho, y crea mas distancia entre e partido, politiconan, gobernantenan y e donacionnan di sector comercial.
Un di e conclusion cu e ta saca como politico y lider di AVP, ta cu e financiamento di partidonan politico mester sucede completamente di otro forma. Mirando e situacion cu a surgi rond di e caso Ibis, nan lo evalua pa cambia completamente e sistema cu partido ta wordo financia door di contribucionnan for di comercio.
Nan lo evalua si e partido politico aki lo ta full carga door di contribucion chikito di su miembronan, ya cu nan ta un partido cu hopi miembresia. Di e forma aki, como partido y politico, bo por bira independiente di henter vinculo cu ta wordo poni, sin cu por ta tabatin niun intencion mes pa esey. Pero e por bira un corelacion cu ta sumamente peligroso pa politiconan y partidonan politico, segun e lider politico.
El a convivi cu Paul Croes, kende a forma parti di su gabinete durante e delaster periodo di gobernacion, pero tambe cu henter su famia. Unabes cu diabierna ultimo hues a condena e ex minister na 4 aña di prizon, ex premier Eman a haya cu esaki ta un proceso cu a dura hopi largo y e tabata uno ‘sumamente doloroso’. Pero e veredicto tambe el a considera uno hopi pisa.
Aunke el a laga sa cu Croes tin e derecho di bay den apelacion, igualmente e ta haya cu ta tarea di Ministerio Publico (OM) atende diligentemente keho cu a yega drenta cerca nan riba dos minister cu ta forma parti di e gabinete actual. Nan kier mira e imparcialidad di OM, mescos cu nan a demostr’e ‘cu tur dolor’ pa por sigura cu e instancia aki por traha independientemente den e caso Ibis durante nan gobernacion.
Eman ta considera importante cu for di henter e caso aki y tambe for di e veredicto, nan por mira claramente cu partidonan politico y politiconan ta den un posicion hopi vulnerabel. Pasobra e partidonan politico y e clase politico ta wordo financia door di contribucionnan di e sector comercial. E ta haya cu si por pone un vinculo entre un donacion y cualkier decision cu un gobernante of gobierno tuma y interes cu ta wordo vincula na dje. “E ta mustra e vulnerabilidad cu tin y nos mester proteha nos institutonan y nos partidonan politico miho contra esey”, el a expresa.
