Ex-prome dama di El Salvador, Ana Ligia de Saca ta ser procesa pa acusacion di labamento di placa y agrupacion ilegal den un schema di corupcion, y den cual su casa Elias Antonio Saca ta sinta den prizon y cu tin tur su propiedad confisca, vocero di fiscalia a bisa.
Casa di ex-presidente Saca (2004 – 2009) tabatin un audiencia inicial hunto cu 15 persona mas, pa ta pertenece na un red di labamento di placa publico, cu a bay directo pa varios empresa cu e ex-presidente tabatin. “Ana Ligia ta ser procesa pa e placa cu a move riba su cuenta, y cu ta forma parti di 246 miyon dollar cu su casa a tuma for di presupuesto di presidencia”, e fuente a splica.
E audiencia aki ta hopi importante, pasobra lo discuti medida cautelar, relaciona cu e manera cu ex-prome dama lo ser someti na e proceso”, Miguel Angel Flores, abogado defensor a bisa. Defensa di e ex-funcionario a solicita na corte siete di paz, pa Ana Ligia por permanece den libertad durante e proceso, pasobra su salud ta delicado y no ta cuadra cu un detencion preventivo.
Flores a bisa cu e medida ta haya apoyo di fiscalia y cu si e kier permanece den libertad, anto mester paga un fiansa, cu lo ser determina pa e tribunal corespondiente. Fiscal Douglas Melendez a sigura cu na mita di luna di nobember 2016, e casa di Saca a move un miyon dollar di un cuenta na su nomber na un banco di Dubai, operacion cu por tin relacion cu desvio di placa cu ta e acusacion contra su casa, ex- presidente Saca.
