(EFE) – Ex-presidente di e empresa Brasileño Odebrecht, Marcelo Odebrecht, condena den e scandal mas grandi di corupcion den historia di Brasil, a pasa ayera pa sinta su castigo na cas , despues di a pasa dos aña y mey den un prizon na e ciudad Curitiba.

E magnate a sali ayera di e Compleho Medico-Penal di Pinhais pa bay husgado di prome instancia di Curitiba, unda a pone un enkelband electronico cu lo keda na su curpa te final di su condena, segun fuente di Polis Federal.

Despues Odebrecht a biaha den su avion priva pa su mansion, den un di e barionan mas rico di Sao Paulo.

E empresario, cu tin e apodo di O príncipe, lo pasa e proximo dos aña y mey na su residencia, y gradualmente lo amplia su grado di libertad segun cu e final di su castigo ta yega mas cerca.

Odebrecht a keda deteni na juni 2015 den cuadro di e Operacion Lava Jato, den cual ta investiga pa casi cuatro aña caba e corupcion den cual a desvia recursonan miyonario di e empresa petrolero estatal Petrobras.

El a renuncia su cargo den e empresa y den e consehonan di administracion di e subsidiarionan di Odebrecht den 25 pais, ya haya un condena di 19 aña y 4 luna di prizon pa corupcion pasivo, labamento di placa y forma parti di un organisacion ilicito.

E sentencia a bin di hues federal Sergio Moro, encarga cu e caso Petrobras y cu a condena varios empresario y politico importante, manera ex-presidente Brasileño Luiz Inácio Lula da Silva.

Na fin di 2016, Marcelo Odebrecht y 76 otro ex- ehecutivo di e empresa a sinta cu autoridadnan y a confesa e practicanan corupto na Brasil y otro paisnan di America Latino.

E acuerdo aki di colaboracion cu husticia a haci posibel reduci nan condena y a provoca un autentico teremoto na Brasil y na otro paisnan di e continente.

Despues di cumpli cu su castigo, Marcelo Odebrecht ainda mester cumpli cu restriccionnan den e ambito profesional y te 2025 e no lo por eherce cualkier funcion ehecutivo den Odebrecht, segun e acuerdo firma cu husticia.

Su tata Emilio Odebrecht a anuncia cu e lo bandona presidencia di e conseho di administracion di Odebrecht na april venidero, y ademas a afirma  cu ningun miembro di e famia lo bolbe presidi e grupo di empresa, segun un programa di restructuracion pa pone e scandalnan di corupcion nan tras.