Dialuna pasa e ex-mandatario Rafael Correa a ser oficialmente acusa den e caso di secuestro di un ex-parlamentario, cu a sucede seis aña pasa, lo cual e fiscal general Raul Perez a yama un ‘crimen di estado’ ya cu el a ser ehecuta pa funcionarionan y cu placa publico.
E hues di Corte Nacional di Husticia, Daniela Camacho, a acepta e peticion di fiscal pa procesa Correa pa secuestro y asociacion ilicito, y a ordena cu e tin cu acudi dilanti di organismonan hudicial di Quito cada 15 dia desde 2 di juli, aunke e ex-gobernante ta biba na Belgica desde un aña caba.
E tesis di fiscalia, cu ta sosteni pa testimonio y documentonan, ta cu Correa tabata implica den e caso aki, pasobra e tabata na e top di e cadena di comando cu a ordena secuestra na Bogota e ex-parlamentario Fernando Balda, ken a ser condena na Ecuador pa calumnia contra Correa y tabata como profugo di husticia na Colombia.
Dos di e tres polisnan deteni pa nan implicacion den e secuestro, ta coopera cu e autoridadnan y nan a entrega prueba di audio y papelnan cu ta conduci na e presidencia di Ecuador cu na 2012 tabata den man di Correa. Ademas, nan tin dos cheque di 10.000 y 11.280 dollar, a cargo di e Direccion General di Inteligencia di Polis, cu nan a usa pa paga un di e agentenan pa e paga esnan encarga cu e secuestro na Colombia.
Correa a insisti ademas cu Fiscalia di Ecuador a vincula su persona na e caso, sin elemento suficiente valido pa e caso aki, y a denuncia di ta victima di e ex-parlamentario Fernando Balda.
E hues Daniella Camacho a nenga e peticion di fiscalia pa pone un armband electronico pa Correa, y a dicta medidanan di proteccion pa Balda.
