Manera a keda anuncia dialuna atardi, Gobierno di Aruba a manda director di Arubus, Edwin Mohamed, cas. Esaki, segun minister di Transport, Integridad, Naturalesa y Asuntonan di Adulto Mayor, Ursell Arends, ta debi, entre otro, na e situacion financiero critico di e compania.
Pa loke ta trata e reemplaso di Mohamed, Bon Dia Aruba a tuma contacto cu minister Arends dialuna puntra si tin director nobo of si tin candidato pa e posicion. Na cual e mandatario a contesta cu no tin director nobo y actualmente ta den proceso pa nombra un director interino—temporario—pa asina tin un persona na cabes mientras cu ta cuminsa e trayecto di busca un director nobo.
El a resalta cu tin un proceso cu mester observa na momento di nombra director y
durante e proceso ey e compania no por keda sin un gerente na cabes.
Relaciona na e mesun topico, e noticiero local, Noticia Cla, a publica ayera cu minister Arends a confirma cu Sr. Frederick Nuboer ta un candidato pa bira director interino di Arubus.
Segun e portal ta reporta, e mandatario a confirma cu nan candidato ta en berdad Sr. Frederick Nuboer. “Frederick Nuboer ta un proposicion pa ta interim directeur” e mandatario a bisa e noticiero, pero na mesun momento clarificando cu no tin ningun decision ainda riba e nombramento.
Noticia Cla a informa cu Sr. Nuboer mes tambe a confirma na e portal cu el a wordo acerca pa e posicion di director interino.
Minister Arends a splica Bon Dia Aruba cu e situacion financiero di Arubus ta critico, cual a wordo confirma pa varios instancia profesional y imparcial. Instancianan aki ta Algemene Rekenkamer, CAft y Price Waterhouse Cooper. Pero a pesar di e situacion, e mandatario tin speransa cu e compania lo por logra sobrevivi e situacion aki.
El a remarca cu pa logra esey Arubus no por sigui enfoca solamente riba nan tarea social, pero mester expande y reforsa su tarea comercial.
E mandatario a splica cu tin un diferencia di opinion y un diferencia fundamental di vision entre e accionista y hunta di directiva, compara cu e director saliente. E punto di salida di gobierno ta cu Arubus no por sigui depende solamente riba fondonan publico y cu e instancia mester expande su servicionan comercial tambe.
“No por hustifica tanto beneficio cu a wordo otorga na trahadornan, sin cu e parti comercial ta produci minimo un resultado aceptabel. Pa un motibo gobierno a haci e empresa un N.V.,” el a remarca.
