10 aña pasa Rob Henriquez, ex presidente di Banco Central di Aruba a purba di stop e benta di Ennia pa Hushang Ansary. Pero e no a logra, entre otro pasobra e empresario tin hopi poder, pa motibo tambe di su relacionnan cu politiconan local y internacional manera e famia Bush. Awor e noticia a sali cu Ansary a saca mas cu 1 biyon florin di e fondonan di Ennia pa inverti den su mesun companianan. Locual ta algo ilegal. E noticia ta basa riba rapport secreto di Banco Central di Hulanda despues di un investigacion.
Ansary tabatin bon relacion cu e instancianan manera Banco Central na Corsou, cu ta encarga cu control riba e sector di seguro. Ansary tambe ta doño di e banco di inversion NIB, cu a fia e companianan di utilidad WEB y Elmar miyones. Esaki a haci cu e tempo cu Henriquez mester evalua e permiso pa Ansary por tuma over Ennia, e tabata dificil pa haci sin presion. Dado momento Banco di Corsou a aproba e benta, pero na Aruba ainda nan tabata warda riba e documentonan cu informacion necesario di Ansary.
Ex CIA den directiva
Un di e cosnan cu Henriquez tabata haya dudoso e tempo ey tabata e nombracion di miembronan den e Hunta di Comisario di Ennia. Nan no tabatin e conocemento sea experiencia riba tereno di seguro sea financiero. Entre otro Ansary a scoge ex spionnan di CIA pa bay den e directiva, asina Henriquez ta conta.
Poder
Henriquez a dicidi di puntra Banco Central di Hulanda pa ayudo y tambe e minister encarga cu Asunto di Reino. “Esaki a resulta na nulo. Pa motibo cu nan tampoco por a haya e informacion di e background di Ansary. Segun Hulanda e informacion tabata asina proteha cu no tabata posibel pa hay’e. Y di locual cu nan tabatin, no por constata nada iregular.” Henriquez mes nunca tabata kere esaki, pero si cu Ansary tin e poder pa cierto informacion no por sali afo. “E tin bon relacion cu e minister di Asunto Exterior, hasta cu e famia Bush (ex presidentenan di Merca).”Ires
Iresponsabel
E noticia cu a sali den prensa Hulandes ta basa riba un rapport cu a leak for di Banco Central di Hulanda di juni aña pasa. “Dicon nan a laga e rapport scondi y nos no sa di dje. Nan a informa Banco di Central di Aruba? Mi ta haya e manera aki iresponsabel”, Henriquez ta continua. E ta contento si cu awor finalmente e informacion ta publico.
Prome paso
Di otro banda e no ta haya cu aseguradonan mester ta asina hopi preocupa, pensando cu nan a perde tur nan placa. “E prome paso ta pa Banco Central di Aruba haci un investigacion profundo unda e placa di e primanan a bay (mas cu 1 biyon florin). Pa wak si e placa t’ey ainda of Ansary a uz’e pa tapa buraconan den su otro companianan. Den e caso cu e placa t’ey, esaki mester bay bek den Ennia.”
Den e caso cu e placa no t’ey y Ennia tin chens pa bay bancarota, Henriquez ta pensa cu lo tin un otro scenario pa preveni esaki. E scenario ta manera nan a haci na Hulanda pa scapa e banconan. E ora Centrale Bank y gobierno lo cay aden y lo uza placa di impuesto pa scapa e compania. Pasobra economia di islanan manera Aruba, asina chikito, no por wanta sla asina grandi, Henriquez ta splica. Miles di hende tin entro otro nan pensioen na Ennia. Y gobierno mes ta fia miyones di e compania di seguro por medio di bonds.
Cliente preocupa
Ennia a haya basta yamada di clientenan preocupa. Aunke tin basta cliente tambe cu no ta na haltura di e noticia. “Hopi erg, mi no tabata sa. Mi tin tur mi seguronan na Ennia, pa 35 aña caba”, asina Edna Peña ta comenta. E ta bisa cu awor e ta bay haci un afspraak pa wak kico ta kico. “Pasobra mi no por paga pa seguro y finalmente ta resulta cu cos no ta cubri.” Te awor clientenan ta bisa cu Ennia mes no a informa nan.
