Ex-presidente Alvaro Uribe a declara aiamars ultimo cu ehercito di Venezuela “tin e ultimo palabra: of nan ta permiti cu nan ta sigui asesina ciudadano, of nan ta interveni pa pone Nicolas Maduro un banda y ta convoca eleccion liber.”
Desde region di Costa Atlantico, unda e ta sigui su recorido den mas di cinco departamento cu su candidato presidencial, Iván Duque, Uribe a toca e tema di Venezuela di e manera mas directo cu cualkier te awor: pidi e militarnan pa pone un fin na e gobierno di Maduro. Pero esey si, seguidamente el a pidi cu e mesun forsa, cu e militarnan mester percura pa convoca “eleccion liber cu por haya e caminda democratico.”
E yamado di Uribe pa baha Maduro a haya apoyo di manifestante cu, manera a sucede na San Alberto, Cesar, a exhibi pancarta grandi cu tabata bisa: “Nos no kier ta un di dos Venezuela.” E declaracion di Uribe, principal hefe di oposicion na Colombia, ta hinca di manera directo e tema di Venezuela den campaña presidencial. E ritmo di e campaña electoral na Colombia ta coincidi cu e empeoramento di e situacion social, economico y politico di e pais bisiña, cu ta toca Colombia di manera directo.
Den ultimo oranan, segun agencianan internacional, e cantidad di Venezolano cu a huy di nan pais pa falta di alimento, a aumenta. Ta conoci cu hopi supermercado a ser asalta pa e ciudadanonan. Y un hecho grave tabata e asesinato di hende di oposicion, manera e ex-polis Oscar Perez, cu a muri na man di militarnan di Maduro. E miles di migrante di Venezuela yegando na Colombia cada dia ta pone e tema di Venezuela halto riba agenda publico y den campaña electoral.
Atende e crisis Venezolano lo ta un asunto obligatorio den e contienda politico, no desde e punto di vista so di e relacionnan exterior di Colombia, o pa e antagonismonan ideologico, sino tambe pa e cantidad di recurso interno cu esaki ta demanda.
