Ayera na Corte di Prome Instancia a tuma luga e tratamento y sentencia di e caso di ex-polis R. Vos denomina pa Ministerio Publico como caso “New York”, ora hues a cuminsa cu e caso el a bisa cu door di e declaracionnan cu Vos a haci su durante interogacion, cu el a coopera totalmente cu husticia, e ta wak e prome paso pa rehabilita di full e proceso duro cu e ta bibando.

Ora hues a haci preguntanan dirigi na Vos, Vos a contesta enfaticamente cu KPA (Korps Politie Aruba) su nomber mes ta KPMA loke ta nifica “Kuerpo Policial Media Arubano.”

Vos tambe a indica cu tabata masha normal cu ora algo interno tabata pasa, “den un rato di ora media tabata na haltura di tur cos, incluyendo Vanessa Kock”, ex-halto comisario ken segun Vos “tabata duna na 24ora informacion policial”, ademas Vos a remarca cu te awe “prensa tin radio policial” refiriendo na e caso di Kamay unda recientemente tabatin un entrada hudicial y a haya armanan di candela na unda un di e co-sospechosonan di inicial N. Andrade tabata prome cu polis den e luga di e suceso aki.

Acusacion oficial contra Vos di Ministerio Publico

Ministerio Publico a acusa e sospechoso Vos di malversacion, abuso di funcion, soborno, ladronicia di propiedad di Cuerpo Policial di Aruba y participacion na un organisacion criminal.

Fiscal su Requisitor

Na comienso di aña 2023, a lanta e sospecho cu Vos tabatin acceso na algun portofoon horta di Cuerpo Policial di Aruba.

Durante un huiszoeking na maart 2023, a bin haya varios laptop y portofoon na cas di Vos.

E portofonnan aki tabata conecta na e tres laptop, riba e laptopnan aki tabata tin un software cu ta yama Zello, un software cu ta haci di un señal analogo, ta haci’e digital cu despues ta ser retransmiti pa cualkier persona cu ta den e grupo. Riba un di e laptopnan a haya un MIFI cu un simcard aden cu Ora Ministerio Publico a haci investigacion na Setar, e number di e simcard tabata pertenece na Headlines Group. E MIFI ta di un di e co-sospechoso, di inicialnan N. Andrade unda tambe a haya mas cu 9.000 mensahe cu informacion policial di sucesonan for di e laptop directamente cu tabata re-transmiti e señal.

Pa e co-sospechoso Andrade ken for di cuminsamento di 2021 pa 10 di maart 2023 segun e declaracion di Vos ta indica, Andrade a keda insisti pa duna Vos 1.500 florin a cambio di e radio, pero Vos a nenga.

Di e co-sospechoso di inicialnan B. Koolman su rol tabata mas den e parti tecnico, tin storing di e sistema di Zello ora ta cay afo, for di combersacionnan recupera for di Whatsapp, fiscal por a deduci cu B. Koolman a bay 2 biaha Vos su cas pa drecha e storing di e sistema aki cu no tabata manda señal.

Pa loke ta trata e co-sospechoso di inicialnan N. Giel e laptop tabata tin un sticker di su compania “MasNoticia” y hasta ora cu Ministerio Publico a habri e laptop a haya su pagina di noticia habri cu e dashboard unda administrado di e pagina so por tin acceso na dje.

Loke ta sospechoso R.Lacle, segun Ministerio Publico Lacle tabata presta Vos placa na un interes di 0% a cambio di informacion policial unda cu den un buki cu nan a haya ta skirbi cu Vos tabata debe e co-sospechoso Lacle, pero tin voorschot cu skirbi den dje segun fiscal, esey ta soborno a cambio di informacion policial.

Tambe fiscal a bisa cu di e forma aki Vos a viola e confiansa cu por a spera di dje como agente policial.

Integridad y rectitud mester ta primordial cerca un ambtenaar, specialmente Vos den su posicion como barrio-regisseur, e cual tin un rol ehemplar. Ademas Vos a crea un riesgo pa su coleganan di KPA y pa ciudadanonan.

Investigacion financiero riba Vos

Mirando e sospecho cu nan tabata tin na e momento ey, Ministerio Publico a haci un investigacion financiero riba Vos unda cu a descubri basta negoshi riba su nomber y nunca e no a declara belasting y e tin debe di 3.9 miyon na belasting.

Esaki tabata un sorpresa pa Vos den Corte mirando cu e no tabata na haltura di e investigacion aki, el a cuminsa yora y a bira basta emocional.

Fiscal su exigencia di castigo pa Vos

Contra e ex-agente policial tin un castigo di prison di 36 luna, di cual 8 luna ta condicional. Ademas Ministerio Publico a exigi un prohibicion pa ocupa cargonan publico pa un periodo di 5 aña y 3 aña di tempo di prueba.

Defensa di Vos

A argumenta con porta cu Vos ken tabata forma parti di un organisacion criminal anto ningun di e 4 co-sospechoso periodistanan no tabata sinta den e sala di corte hunto cune enfrentando husticia, tambe su abogado a argumenta cu no por ta un organisacion criminal mirando cu tin concurencia entre e 3 media, cu nan proposito ta pa busca noticia, tambe e no ta wak un structura y no ta wak un organisacion.

Tocante di e ladronicia, defensa ta argumenta con e por ta ladronicia cu e radio ta pertenece na su persona, el a haya e radio door di KPA y e tabata tin’e den su poder durante e entrada hudicial.

Sentencia inmediato di Vos

Corte a dicta inmediatamente y a condena Vos pa un castigo di prison di 16 luna, di cual 8 luna ta condicional. Ademas hues a prohibi’e pa ocupa cargonan publico pa un periodo di 3 aña.

E acusacion di organisacion criminal den opinion di hues no a ser proba.

Vos a ser condena pa malversacion, violacion di ambtsgeheim, abuso di su funcion y corupcion door di miembronan di prensa.