Ultimo dianan Ministerio Publico (OM) ta bin hayando bishita di politiconan cu ta bin haci nan denuncia cerca e organo hudicial aki.

Ayera mainta, un biaha mas ex Parlamentario y vocero di partido AVP, Melvin Tromp, a presenta na e adres Rumbastraat 29 pa entrega loke el a cualifica como mas ‘prueba palpabel’ cu ta compromete Prome Minister, Evelyn Wever-Croes, di conflicto di interes. Tromp a bay compaña cu e lider di fraccion di AVP, Marlon Sneek y parlamentario Michael Lampe, kendenan tambe a referi na e caso aki.

“Nos ta bisa, mientras cu nos ta haya prueba, nos ta yega atende cu Ministerio Publico (OM) pa OM haci nan trabou,” el a bisa. Tromp su deseo ta pa e instancia aki por haci nan trabou di investigacion den e caso aki, y pone e atencion rekeri, manera nan ta bin haciendo den otro casonan. Pues e ta spera cu OM a base di tur locual a wordo entrega lo sa di haci nan investigacion.

Interes particular.
E ta relaciona cu e caso di Utilities y Refineria di Aruba (RdA), caminda buffet di abogado di prome minister a haya apoderacion pa representa nan, segun Tromp. “Mi ta puntra mi mes pakico bo tin cu podera un persona cu ta pertenece na un buffet di abogado di bo tata, caminda bo ta heredero, abo tambe ta forma parti di e buffet aki,” el a bisa. Ademas e ta haya cu e prome mandatario tin e responsabilidad pa atende cu e cinco departamentonan cu ta resorta bou su ministerio.

Tromp a declara cu despues di un par di siman pasa cu el a introduci un denuncia na OM contra Premier Wever-Croes, el a yega di anuncia cu nan ta bezig ‘filtrando mas informacion palpabel’ cu ta drenta den nan post box, y cu ta indica cu tin actonan cu no ta corecto.

Mirando cu nan a haya mas prueba, nan a dicidi di haci entrega adicional ariba e prome denuncia di conflicto di interes cu nan a haci contra e prome mandatario. E hecho cu nan ta ricibiendo mas documento, nan ta haya mas animo pa sigui bini cerca OM pa entrega nan. E por a tende cu e mandatario a haci un contra-denuncia contra su persona, pero e no sa cual tabata su ponencia. Mientras cu e ta haya cu loke nan ta bin presentando contra e prome mandatario, ta pone den evidencia cu cosnan indebido ta tumando luga den su maneho.

Tromp a referi cu tin cinco departamento cu ta resorta bou maneho di e prome mandatario, caminda e tin e deber di frena cosnan cu no mag di sosode. E ta indica cu ora e mandatario a sinti ‘e cayente’ di e rosea di pueblo ta su tras, a manda un carta caminda a pidi e directornan pa tene cuenta di no haci uzo di un solo buffet di abogado. Pero den e mesun carta, e ta nombra un abogado di e buffet di e mandatario su tata, caminda Tromp ta indica cu e mandatario ta heredero, y cu e tambe ta forma parti di e buffet aki. Aunke actualmente mirando cu e ta den gobierno, e mandatario ta staciona su derechonan, te ora cu pueblo ta dicidi otro.

Den e buffet aki el a nombra un abogado pa represent’e den un directiva dunando tur e apoderacion pa ‘haci y deshaci,’ segun Tromp. Ademas e ta haya cu niun abogado ta bay sinta den un directiva por nada. “Tende, e cos aki ta placa!” el a bisa categoricamente.

El a referi cu ta existi un relacion di basta tempo entre director di Utilities, Richard Eman, cu e prome mandatario, pero tambe cu e mandatario su tata, Hendrik Croes kende ta doño di e oficina Croes-Wever & Ruiz. Igualmente el a agrega cu Richard Eman a forma parti di e board di BBA-Bank, cu tabata situa den e mesun edificio di e buffet menciona. El a afirma cu definitivamente e caso aki tin di haci cu conflicto di interes, y nan tin tur e pruebanan cu ta sostene e denuncia cu nan a haci.

Falta di integridad.
Mientras cu parlamentario Sneek a bisa cu ora cu nan a entrega e prome prueba, unda nan a mustra riba un di e cobransanan relaciona cu dos abogado di e buffet menciona a sinta cu director di Utilities, y cada abogado ta cobra ariba su mes, unda un reunion di tres ora a costa pueblo mas cu 3 mil florin. “Un manera structural pa strica placa,” el a bisa.

Nan ta cobransa di miles di florin –segun Parlamentario Sneek– cu bo no ta mira normal riba otro recibonan di ningun buffet di abogado. P’esey nan a dicidi di haci e keho pa OM bin cu un investigacion. El a mustra e volmacht cu prome minister mes a firma pa duna autorisacion na un oficina di abogado cu e ta parti di dje pa haci trabou pa gobierno.

El a reitera cu akinan ta un conflicto di interes caminda e prome minister cu ta doño di un oficina di abogado ta duna su mes buffet trabou cu ta resorta bou su ministerio. “Esaki no por! Esaki no ta integro!,” el a expresa categoricamente.

Di su banda, Parlamentario Michael Lampe a reforsa locual su coleganan di partido a yega di trece dilanti. Igualmente el a añadi cu ora bo ta ricibi documentonan cu ta duna indicacionnan serio di minister president den un caso di ‘zelfverrijking,’ e ta kere cu ta na su luga pa no para keto.