Pa ex minister encarga cu Serlimar durante gobernacion anterior, y actual parlamentario di oposicion, Benny Sevinger, mal gastamento di miyones di florin a tuma luga den e compania estatal aki, prome cu gobierno actual a atende debidamente e necesidad di e trahadonan.
Sevinger a declara na Bon Dia Aruba cu tur cos ta cuminsa cu intencion di ex-minister Otmar Oduber, kende tabata encarga cu Serlimar. “Bo hinca e compania aki den debe astronomico,” el a declara. El a laga sa cu e aña aki pa presupuesto 2020, prome cu e mandatario a baha como minister, a presupuesta no 22 miyon, sino 30 miyon, pasobra e gasto di Serlimar a subi. Mientras cu e ex-minister mes aki a percura pa e gastonan di Serlimar a subi innecesariamente.
Un suma di 18 miyon a wordo gasta – segun Sevinger– den e prome cuater lunanan di 2019. Esaki di acuerdo cu e relato of kwartaal cu a wordo duna na CAFT aña pasa. “Naturalmente e placa no por a yega!”, el a bisa.
Esaki a conduci cu gobierno a bin bati porta di Parlamento pa haya apoderacion pa miyones di florin extra pa paga salario di trahado, lagando esaki na ultimo. Mientras cu e ta condena cu e shownan y beneficionan pa nan sponsor tabata na prome luga. “Esey ta e situacion cu nos ta! Serlimar debe tur caminda. Serlimar no por ni cumpra gasolin. Anto Otmar Oduber hunto cu su friendnan a yoyo cu tur e placa aki,” el a agrega.
Presupuesto y gastonan.
E ta haya cu e hecho cu e no ta minister mas, no ta kita e responsabilidad cu Otmar Oduber tin cu carga durante e gobernacion aki. Sevinger a bisa cu ora Oduber a drenta den gobierno, Serlimar tabata haya 16 miyon for di gobierno. E resto, e compania aki mester busca den sector priva pa e por cera su presupuesto.
Pero unabes cu Oduber a forma parti di e gabinete actual a laga sa cu Serlimar no por sigui asina y gobierno mester garantisa su presupuesto completo. Di su banda e fraccionnan di coalicion MEP, POR y RED a aproba pa duna 6 miyon mas, kiermen 22.5 miyon florin a haya den e prome presupuesto pa cubri tur gasto di Serlimar.
E gasto di Serlimar tabata 22.5 miyon, pero e ex mandatario en cuestion den e prome ranca a bay huur un edificio cu ta costa casi 1 miyon pa beneficia amigonan y familiar. Tambe el a bin cu gastamento di placa di promocion y propaganda. El a bisa cu e tipo di promocion aki, un suma di 1 miyon florin pa aña, a ‘bay pa bo propio compania’di advertisement di e ex mandatario.
Igualmente a pone cara di artistanan pa Serlimar paga miles di florin pa luna. Sevinger a bisa cu e no tin nada contra di e artistanan, pero si nan ta ‘pone mi cara, por nada mi ta hacie’. “E pregunta su mes cu tur respet: Kico esaki ta bay trece pa beneficio di Serlimar?” E no ta haya cu esaki a trece un beneficio extra, mientras cu e situacion di Serlimar ta malo.
No contento cu esaki, gobierno a bay cumpra trucknan nobo, mientras cu e otro trucknan tabata bon ainda. “Bay wak con nan ta frustia na Parkietenbos. Eynan ta para. Esakinan ta costa miyones extra,” el a bisa.
Tambe nan a dicidi di kibra contracto cu e empresa Johnson’s, cu tabata wordo paga door di DOW pa atende cu e desperdicio produci pa nos sistema di riool. “A kibra e contract pa laga DOW paga un parti y Serlimar paga otro parti na friends and family di sponsor di carnaval,” el a bisa.
Ademas a dicidi di cumpra y inverti cantidad di placa den un incinerator cu no ta sirbi, mientras cu e dump ta keda habri causando molester den e bisindario. Mientras cu 3 luna a pasa di e destaho, caminda tin un expectativa grandi cual compania a gana e bid. Niun hende sa si e destaho a para of no a para. Como parlamentario di oposicion, e ta compronde cu e mandatario anterior no t’ey; pero e ta haya cu prome minister Evelyn Wever-Croes kende a keda encarga, mester duna claridad pa nos comunidad.
“Esey ta e realidad di Serlimar na e momentonan aki!,” Sevinger a sentencia.
