Cu hopi skepticismo partido di oposicion a tuma Minister Otmar Oduber su anuncio di retiro for di gobierno y principalmente for di arena politico.
Ex Minister y Parlamentario, Benny Sevinger (AVP) a bisa cu e retiro aki tin un motibo su tras. Pa Sevinger, e mandatario en cuestion ta retira no pasobra e tin di haber cu e situacion di Serlimar y e supuesto deal cu e compania cu lo gana e bid pa bin cu insinerado. Tampoco pa motibo familiar, of di salud, ya cu e por a haci’e no awor, sino dos aña pasa caba.
Sevinger, kende den pasado tabata colega di Oduber durante gobernacion pasa Mike Eman I y II, a cualifica Oduber como un ‘narcisista’ cu no ta haci nada por nada. “E no ta tuma un decision, si no ta wordo calcula kico ta e consecuencia y kico e por gana for di esaki”, Sevinger a bisa.
Investigacion di corupcion.
Aunke e mandatario a anuncia ayera mainta su retiro for di gobierno y for di politica pa motibo personal, pa e Parlamentario di oposicion, e retiro aki tin un cos grandi su tras. E ta haya cu henter e caso di corupcion cu tabatin cu bendemento di tereno cu un tal Corona ta un señal cu ‘e ta sinti e cayente di investigacion den su nek’.
Sevinger a agrega cu Hulanda tin den su target e Minister di Infrastructura actual den su acto di corupcion. Den e caso aki -segun Sevinger- Oduber a prefera di retira su mes prome cu nan ta gar’e y asina percura cu e presion por baha y evita cualkier investigacion riba dje. “Esey ta loke mi ta kere cu ta un di e puntonan cu e ta analisa,” el a bisa.
Otro punto cu segun Sevinger a conduci pa Oduber anuncia e retiro aki, ta cu e mandatario ta analisa cu medidanan ta biniendo, cu ta bira consecuencianan pa pueblo di Aruba. Ya cu Hulanda ta poniendo presion y e mandatario en cuestion kier bandona e barco prome cu e ta wordo responsabilisa di e medidanan no popular aki cu ta na caminda, y asina laga e partido mas grandi den coalicion carga e responsabilidad aki. “No ta nada otro di loke el a haci den pasado caba”, el a bisa.
Sevinger a indica cu esaki no ta e prome biaha cu Oduber ta haci e tipo di maniobra aki. Den pasado el a yega di haci’e den gobernacion pasa, tempo ‘cu e tabata cu nos, y bay Gobernador pa purba di pone presion riba su coleganan’.
E ta revela cu Oduber kier a pone presion riba nan pa nan tuma otro pasonan cu e tabata kier. Y e no ta descarta cu e mesun presion aki e kier pone riba Gabinete Wever-Croes, specialmente considerando e medidanan cu lo ta na caminda y tambe pa e ley controversial di Serlimar.
