Ex-minister, Alex Schwengle a entrega su computernan y tambe un telefon celular na Bestuurskantoor.
Esaki a sosode via su abogado, cual nomber no a ser menciona den e comunicado cu Bon Dia a ricibi di gobierno. No ta conoci e motibo dicon e ex-mandatario a dicidi di keda cu e articulonan aki cu no ta di su pertenencia, segun e gabinete na mando. Sinembargo e hecho cu el a bin dilanti y entrega esakinan por sirbi como un ehempel pa si acaso tin otro mandatarionan di e gabinete anterior cu tambe tin pertenencianan di gobierno ainda den nan poder, nan tambe por entrega esakinan.
Manera ta conoci, e gabinete na mando a constata cu falta basta ekipo desde cu nan a haya e mando pa goberna nos pais. Segun nan, falta entre otro ‘customized Imac, customized computers, laptop, Ipad, y camaranan’. Esakinan ta ekiponan caro y cu ta wordo uza pa conferencia di prensa, segun e comunicado.
Tur ekipo cu tin y cu lo wordo cumpra ta wordo registra debidamente, segun gobierno. ‘Algun di e ekiponan aki a wordo entrega bek na gobierno y ainda falta varios articulonan cu ainda mester wordo encontra of entrega’, e comunicado ta clausura.
