Un proyecto cu ya den pasado y awor den presente a crea cierto reaccion te hasta controversia, specialmente cerca e organisacionnan medio ambiental of NGO nan, ta e proyecto di eco-turismo Isla di Oro, situa net den e frontera entre e districtonan di Pos Chikito y Savaneta.
Minister di Turismo, Dangui Oduber a yega di manifesta na Bon Dia Aruba cu e gobierno actual di coalicion (MEP-POR-RED) su vision cu e proyecto aki ta cu e lo yuda eleva e calidad cu nos ta brinda na e turistanan. Logicamente nan ta pro pa e proyecto aki por bira un realidad. Pero prome cu esaki tuma luga nan mester bin cu un cambio of adaptacion riba e ‘ontwikkelingsplan’ (ROP) pa e inversionistanan por desaroya e proyecto aki, ya cu actualmente e ta un area reserva pa naturalesa.
A pesar cu actualmente nan ta den oposicion, ayera ex minister di Infrastructura y actual parlamentario di AVP, Benny Sevinger a declara na e matutino aki cu nan fraccion ta pro e proyecto aki. Esaki manera tabata den pasado ora cu e mandatario actual, Otmar Oduber (POR) a forma parti di e gabinete ultimo, Mike Iman II, como minister di Turismo.
Estudionan y ROP
Ex-minister a bisa cu den pasado estudio a wordo realisa di e impacto ambiental riba e proyecto aki. Nan a bini cu expertonan di afo y nan a duna un presentacion rond di Aruba. Sinembargo ora cu e inversionista ta haya su opcion legalmente, locual nan no tin ainda, ya cu mester cambia e ROP prome, e ora ey nan mester entrega e estudionan medio ambiental na e departamento di DIP, encarga cu e asunto aki. Di e forma aki expertonan di gobierno lo tira un bista riba e rapportnan aki. Y si tin cambionan, nan lo mester wordo haci debidamente.
Parlamentario di oposicion, sr. Sevinger a laga sa cu naturalmente e proyecto aki ta carga su sosten. “E ta un bon proyecto semper y cuando nos tin cu tene cuenta cu loke e rapportnan ta bisa cu nos medio ambiente.” Igualmente nan mester crea un fondo cu lo yuda mantene henter e area aki, ya cu e ta considera un prioridad pa conserva e area bunita aki. Y pa esaki lo ta posibel e inversionistanan mester contribui na e pago di esaki.
E ta haya cu e asunto no ta solamente conserva nos naturalesa, pero nos mester por tin fondonan pa mantene esaki. Un di e idea original ta pa e resort aki lo ta encarga pa percura e fondonan pa mantene henter e area aki cu mester keda uno caminda e naturalesa ta wordo conserva y protegi. Pues e proyecto aki no ta bay destrui e manglo nan, sino a contrario lo bay mantene e manglo nan, segun sr. Sevinger.
E desaroyadonan lo mantene expertonan den nan servicio pa yuda mantene e manglo nan. Nan lo percura pa mantene specialmente e manglo nan y e piscanan cu ta habita den e medio ambiente marino aki. E ta considera cu no tin niun motibo pa rechasa e proyecto aki pasobra e no ta afecta nos naturalesa. A contrario e ta haya cu e proyecto aki por bini man den man cu e parti di turismo y medio ambiente. “Cu mi sosten nan ta conta sigur!,” el a declara na Bon Dia Aruba.
Den pasado ora cu ex-minister di Turismo di e gobierno anterior, Otmar Oduber a bin cu e proyecto aki, e gabinete anterior a sostene e proyecto di Isla di Oro. Sr. Sevinger a laga sa cu den nan maneho cu nan tabatin semper nan a bisa cu mester bini cu diferente producto cu ta cuadra cu un nivel halto di turismo. Den cuadro ey semper nan a papia di e concepto di boutique hotel. Den e caso aki e proyecto di Isla di Oro no solamente ta un boutique hotel. Pero tambe – segun e miembro di fraccion di AVP- ta cumpli cu tur e rekisitonan pa locual ta trata eco-turismo.
E ta un tipo di proyecto cu ta existi na diferente parti di mundo cu ta situa den lama patras di henter e plantacion di manglo nan cu ta un sorto di vegetacion cu ta protegi pa ley. Parlamentario Sevinger a papia cu tras di e proyecto aki tin un grupo di inversionista cu a cumpra e ex-Isla di Oro, pues nan tin e propiedad aki caba. Locual nan ta pidi gobierno ta pa expande y bin cu cambio riba ROP pa asina nan por haci e proyecto realisabel.
E tempo ey gobierno anterior a duna luz berde pa e proyecto aki bira un realidad. Nan a bin cu diferente expertonan internacional riba tereno di medio ambiente caminda nan a haci presentacion na diferente organisacion medio ambiental. Tambe na Aruba y algun di nan a aproba esaki pendiente pa bin cu mas investigacion. E impedimento tabata cu mester cambia e ROP y nan tabata den e proceso ey. E tempo ey parlamento tabata pro di e proyecto aki. E ta haya cu e proyecto aki lo crea actividad pariba di brug. E ta spera cu e gobierno actual lo sigui cu e proceso di cambio riba ROP, ya cu e ta considera esaki como un bon proyecto.
E no ta kere cu na Aruba nos mester keda den e posicion di critica so, pero tambe di por duna nos contribucion tambe na momento cu tin un proyecto cu ta complementa nos naturalesa. No ta cuestion di naturalesa si of desaroyo si, sino e ta haya cu ta un cuestion cu naturalesa por traha man den man pa tin un producto cu Aruba por sali beneficia di dje. E ta haya cu e proyecto di Isla di Oro sigur lo contribui den esaki, unda naturalesa y desaroyo economico lo sali beneficia y tambe pueblo di Aruba.
Antecedente
Mientras cu dialuna ultimo un grupo di ambientalista a protesta contra e proyecto aki na haltura di entrada di Isla di oro. Nan kier pa conserva e area aki y no bin cu niun sorto di hotel.
Por cierto dia 1 di april 2015, e matutino aki a yega di publica un articulo caminda e actual minister encarga cu Medio Ambiente a yega di expresa su desapunto, ya cu loke a wordo mustra riba loke a wordo presenta den Green Aruba e tempo aya di e proyecto, no tabata at all e plannan ey cu a wordo presenta na gobierno y e NGO nan e tempo ey.
E proyecto a bira uno di 140 pa 160 camber, y segun e mandatario completamente contrario na e plan original. E nomber di e proyecto e tempo aya conoci como Zoëtry Isla Di Oro Arub’, tabata papia di un inversion di 40 miyon dollar. Un ‘boutique hotel’ maske e hotel lo haya 126 camber, e lo ta uno totalmente ecologico cu lo duna trabou na casi 800 persona y ora e hotel ta cla, e ta conduci na 252 cupo di trabou directo y 165 indirecto.
Ya caba e ex-minister di Turismo, Otmar Oduber, sin por a pronostica cu e lo bira un dia minister di Medio di Ambiente den otro constelacion di gobierno, a yega di sinta cu e desaroyadonan. Y segun nan ‘ningun mangel lo wordo kita of daña’ pa acomoda e hotel, segun sr. Oduber a yega di bisa e tempo aya. Pues nan ta garantisa e proteccion di e medio ambiente. Pa construccion lo uza material cu tambe ta bon pa medio ambiente y ta organico.
Bon Dia Aruba a trece dilanti cu riba e website Travel Pulse por mira un articulo riba e proyecto tambe dia 30 di maart 2015. E compania tras di e hotel ta AMResorts cu ta cay bou Apple Leisure Group. E ta trece su marca di Zoëtry Wellness & Spa Resorts na Aruba, cu lo bira su di cinco hotel. A wordo informa cu Isla di Oro mes ta den man di Franz Sydow y un grupo di inversionista internacional. E articulo tambe ta menciona cu e hotel lo bira un di e prome cu tin camber estilo di bungalow riba lama.
