Recientemente minister Otmar Oduber(POR) a duna un rueda di prensa caminda e ta bisa cu ta falta , entre otro celularnan di appel mas computernan cu a wordo horta di bestuurkantoor. Aki ta unda e ex mandatario Alex Schwengle ta reacciona. “Mi no ta activamente den politica mas y desde november mi ta activo como specialista di pulmon bek. Mi ta lamenta cu ta purba hinca mi den politica bek.
Ta parce e ta haya mi falta”, asina Alex Schwengle, ex minister di Salud Publico, Maneho di nos Grandinan y Deporte, a reacciona despues cu Minister Otmar Oduber(POR) a atake ayera y insinua cu el a hiba computernan cas sin puntra y cu awor ta laga abogado manda carta pe. E ex mandatario a sigui bisa cu un bos serio cu “mi ta lamenta masha cu ta purba desacredita mi y den medionan yega na gobierno nan a yama mi pa ladron y a insinua cu mi a confirma di a horta ekipo”. E solo hecho cu minister Otmar Oduber(POR) ta bay den un conferencia di prensa y bisa e disparatenan aki ta muestra cu no tin trahamento,ni tin vision, sino e unico obhetivo ta persecucion y vengansa politico.
“Laga mi desapunte cu mi no a horta ekipo y ni mi ta ladron. Locual mi a haci ta, manera e maneho ta, mi a skirbi un carta dia 7 di november ultimo pa Directie Financien, ora mi tabata minister ainda, den cual mi ta puntr’e kico lo costa pa mi keda cu e aparatonan di computer cu mi a uza personal durante e ultimo 4 añanan. Mescos mi a pidie cobra mi pa e celular cu mi ta keda cu ne tambe”, e ex mandatario a aclaria. Riba e carta e no a haya contesta ainda. Pero como cu el a nota cu e gobierno aki ta riba un racha di persecucion politico, el a laga su abogado bolbe manda un carta, referiendo na su peticion haci. Esaki precisamente pa evita cu ta purba hink’e den un luz politico, locual precisamente minister Otmar Oduber(POR) ta purba haci awo. “Mi kier aclaria cu e motibo cu mi a pidi pa keda cu e computer, laptop y iPad ta pasobra mi a uza nan e ultimo 4 añanan, a custuma cu nan y ta Ex minister Schwengle ta lamenta e expresionnan di Otmar Oduber contene tur mi documentonan y informacionnan.
Claro mi por cumpra un nobo, pero pa mas facil mi a pidi Departamento di Financia pa cobra mi nan balor. Esey no ta ladronicia, e ta regla den ley cu un minister saliente ta hiba e ekiponan personal cu el a uza den su periodo, claro pagando loke e ekipo bal”. Dr. Alex Schwengle a sigura cu pa awor e lo dedica su atencion na pashentnan y no ta interesa pa keda den un discusion politico pasobra e no ta activo mas. Si el a termina bisando su ex colega Otmar Oduber(POR) pa e bay cu masha cautela ora e uza e palabranan ladron y horta contra dje.
