Prome cu el a bira minister di Financia, Xiomara Ruiz-Ruiz-Maduro a laga sa cu minister saliente di Salubridad Publico no tabatin apoderacion di parlamento pa e gasto adicional di 80 miyon florin cu el haci riba e proyecto di renobacion y expansion di hospital.

E suma aki destina pa bin cu mas camber di cuido intensivo (ICU) y un seccion di microbiologia no a pasa su debido proceso den parlamento, cu ta e organo cu ta controla gobierno, kiermen e ta contra ley, segun sra. Ruiz-Ruiz-Maduro.

“E ta contra un apoderacion, e ta contra ley. Nos por tin otro smaak pero ley, un smaak e tin”, el a declara. Kiermen si bo ta contra ley e ex mandatario tin problema ya cu tin sancion cu ne.

E ta haya cu mirando e situacion precario di financia publico un suma asina tin su impacto, specialmente pa un gobierno cu a caba di huramenta ayera. Independiente di e necesidad y importancia di e proyecto aki, e ta haya cu e asunto aki ta uno di deber etico pa e trabou cu bo ta eherce. Ainda den su calidad di parlamentario, sra. Ruiz-Maduro a mustra e documento Vademecun Openbare Financien 2017/21 cu departamento di Financia e elabora recientemente den e proceso di formacion di gobierno.

El a bisa cu e documento aki ta contene informacion cu ta presenta e fix nan manera nan ta, e situacion ta di preocupacion. Riba pagina 86 di e documento aki ta para e gastonan cu a subi debi cu e proyecto di hospital a cambia caminda e ta wordo amplia cu cambernan di ICU, pero tambe pa un seccion of departamento pa micro biologia, y e mandatario cu tabata encarga no ta autorisa pa haci gastonan extra.

“E cos aki no tin un color politico”, el a declara. E situacion aki ta sinta segun actual minister di Financia cu no tabatin un apoderacion di parti di ex minister Alex Schwengle pa bin cu e suma aki sin pasa e debido proceso dilanti parlamento. Sra. Ruiz-Maduro a señala cu nos tin leynan pa ordena nos sistema. “Si bo kier haci cos contra ley claramente bo ta expone bo mes na cuestionamento di parlamento. Un parlamento cu ta haci su trabou e tin cu cuestiona esaki…”, el a bisa.

Encuanto e asunto aki, sra. Ruiz-Maduro ta indica cu e cifranan y echonan ta uno real. Pues e echo cu e ex mandatario no tabatin un apoderacion y e echo cu bo kier konkel algo sin bin parlamento manera cu ley ta prescribi, e ta reitera cu ta algo contra ley y contra etica di su funcion den nos pais.

E ta haya cu tabata mas etico cu si e ex mandatario di Salubridad Publico por a ripara cu e situacion aki relaciona cu gasto y suma adicional di e proyecto di hospital ta andando pa basta tempo caba, e mes mester a presenta dilanti parlamento y pidi un audiencia pa debati riba e asunto aki y no bin presente na parlamento na final ora cu e fix ta cumpli.